• 17 İyun 2024 07:48

Ceyhun Əliyevdən “Qarabağ”ın ilk oyununu DƏYƏRLƏNDİRMƏ: “Qrupdan çıxmayacağıq”

“Frayburq”-“Qarabağ” oyunundan sonra həmişə olduğu kimi, müxtəlif mülahizələr və tənqidi yanaşmlar sərgilənsə də reallıq bi idi: – Komandamız turnirə uğursuz başladı. Elə matçın ilk 15 dəqiqəsi də “Qarabağ” üçün çox uğursuz oldu. Uğursuzluq Toral Bayramov üçün də eyni paraleldə dayanmışdı.

““Qarabağ”ın səviyyəli məğlubiyyəti” kimi adalndırılan bu oyunları əvvəllər də görmüşdük. İndi bir boy böyümək lazım idi ki, tullandığımız hündürlük “boyumuza uyğundur” deməsinlər. 
Biz də boyumuzdan hündür tullanmamaq üçün, ya da bir boy daha böyümək üçün dünənki “səviyyəli məğlubiyyəti” işin bilicisi, idman şərhçisi Ceyhun Əliyevlə çözdük:

– Ceyhun müəllim, öncəliklə matça bir dəyərləndirmə aparaq, “Qarabağ” oyuna necə başladı?

– Təəssüf ki, ağdamlılar start həyəcanını boğa bilmədi. “Frayburq” isə tam əksinə, daha zəngin avrokubok təcrübəsi olan Azərbaycan çempionunun müdafiə redutlarını asanlıqla yarırdı. Açığı, Qurban Qurbanovun komandasının belə həyəcanlı olması mənim üçün gözlənilməz oldu. Bəli, rəqib Bundesliqanın lideridir, amma çempionumuz bundan da əzəmətli rəqiblərlə çox oynayıb axı. Yalnız 15 dəqiqəyə vurulan 2 qoldan sonra təmsilçimiz o “duz yükü”nü üzərindən ata bildi.

– Turnirdən əvvəl “Qarabağ” ən parlaq oyunçularından biri İbrahim Vadji transfer hüququndan faydalandı. Necə gördünüz, bu oyunda komanda onun yerini doldura bildimi?

– Təəssüf ki, belə mötəbər turnir öncəsi Vadji komandanı tərk etdi. Daha üzücü isə budur ki, onun əvəzinə heç kim alınmadı. Kvabena Ovusu pis futbolçu deyil, amma o, “Qarabağ”ın “1-ci skripkası” olmaq səviyyəsində deyil. Məlum olduğu kimi də, qrup mərhələsinə artıq yeni oyunçu sifariş vermək olmaz. Təki məhz bu boşluq qrupun taleyini müəyyənləşdirməkdə həlledici rol oynamasın.

– Komandamıza hakimin basqısı vardımı?

– Məncə, hakim basqısı deyil bu, hakim hazırlıqsızlığıdı. Rəqibin Almaniya təmsilçisi olması referini təzyiq altında saxladı. Elə aşkar penalti epizoduna göz yummasında da hansısa siyasi çalar axtarmaq lazım deyil.

– İki hissənin sonunda hansı qənaətə gəldiniz, oyunun ədalətli nəticəsi necə olmalı idi?

– Hesab edirəm ki, meydan sahibləri qələbəyə layiq idi və heç bir halda xal itirməyəcəkdilər. Açıq danışmaq lazımdı, “Frayburq” “turbo mühərriki”ndən istifadə etmədi, buna zərurət duymadı.

Əlbəttə, yalandan “palaza bürün, ellə sürün” misalına uyğun mən də “çempionumuz qələbəyə layiq idi” deyib özümü “yaxşı oğlan” obrazında göstərə bilərdim. Ancaq reallığı sən  danışmasan, mən danışmasam, o danışmasa, vallah, inkişaf etməyəcəyik.
– Qrupumuzda dünənki oyunların nəticəsinə görə vəziyyəti necə dəyərləndirirsiniz?

– İlk turun nəticələri mənim üçün təəccüblü deyil. “Böyük beşlik” ölkələri təmsilçiləri evdə qələbə qazanmasın, neyləsin? Əsas Bakıdakı oyunlarda maksimum xal toplamaqdı, bir də 3-cü yer uğrunda əsas rəqib saydığım “Olimpiakos”dan çalışıb 4 xal qoparmaqdı.

Biz hadisələrə real yanaşmalıyıq. “Qarabağ” qrup 3-cüsü olsa və bununla da Konfrans Liqasının pley-offuna vəsiqə əldə edə bilsə, bu, yetərincə uğurlu nəticə sayılmalıdır. Çünki klub rəhbərliyi daha ali məqsədlər üçün daha çox vəsait yatırmalıdır.

Zakir Abbas, Bizim.Media

Tacxeber.az

Oxşar xəbərlər