Deputat baş məsləhətçisi Allahşükür Paşazadə olan kitabdan danışdı: “Əsir düşən qadının halal olması İslamda yoxdur”
“Kəşfül Həqayiq” adlanan Azərbaycan dilində ilk “Qurani-Kərim” kitabı Qafqaz Müsəlmanları İdarəsi tərəfindən yenidən çap olunub. Üç cilddən ibarət nəşrin baş məsləhətçisi Şeyxülislam Allahşükür Paşazadədir. İlahiyyatı Elşad Miri isə kitabın 244-cü səhifəsində “Nisa” surəsinin 24-cü ayəsinin tərcüməsi və təfsirini müzakirəyə çıxarıb. Belə ki, ayədə “ərli qadınlar sizə haramdır” buyurulur, lakin kitabdakı təfsirdə “müşriklərlə cihad edən vaxt əsir alıb, sahib olduğunuz ərli qadınlar istisnadır” yazılıb. Yəni müsəlman kişiyə kafirlərlə savaşda əsir aldığı ərli qadın halaldır. İlahiyyatçılar İslamda bunun qəbuledilməz olduğunu, bu təfsirin heç bir İslam hökmünə aidiyyatının olmadığını deyirlər.
Milli Məclisin İctimai birliklər və dini qurumlar komitəsinin üzvü Ceyhun Məmmədov Pravda.az-a açıqlamasında deyib ki, zaman-zaman İslam hökmlərinə bir sıra dəyişikliklər edildiyi müşahidə edilib: “Bir müddət mövcud olan hökm sonradan dəyişdirilir, şəriətdə onunla bağlı fərqli hökmlərin də olması bildirilir. Müxtəlif dini mənbələrdə fərqli fikirlər səsləndirilir, yanaşmalar müxtəlifdir. Bəzi müsəlmanlar düşünürlər ki, dinimiz bunu qəbul edir, bəzi alimlərin isə yanaşmasına görə, İslamın ilkin yarandığı dövrdə bu kimi müəyyən yanaşmalar olub. Amma “Quran” ayələrinin məzmununa, İslamın prinsiplərinə, dəyərlərinə, müasir dövrdə cəmiyyətdə gedən proseslərə gələndə, bilirik ki, İslam dini humanist dindir. İslam insanlara digər dinlərə, xüsusilə səmavi dinlərə hörmətlə yanaşmağı tövsiyə edir. İslamın prinsiplərinə baxsaq, bu, halal deyil. Dini mənbələrdə, kitablarda çox fikirlər var. Hansısa müəllif əsər yazanda fikirlərində səhvə yol verə bilər. Əsir düşən qadının, hətta əri olsa belə, müsəlmanlara halal olması İslamda yoxdur. Amma bəzi əsərlərdə, mənbələrdə belə hallara yol verilir. Müasir dövrdə bu cür yanaşmalar düzgün deyil. Bu, dinimizə qarşı xoş fikir və təəssürat yaratmır. Ona görə də bu kimi təfsirlərdə, fikirlərdə diqqətli olmalıyıq. Düşünürəm, bu məsələnin geniş müzakirəyə çıxarılmasına da o qədər ehtiyac yoxdur. Çünki İslamın mövqeyi, yanaşması konkret ortadadır. Bu mövqeyi hər zaman qorumalı, İslama yanaşmamızda da buna əməl etməliyik”.
Aytəkin Qardaşova
