“Sədərək” ticarət mərkəzinin sahibi Yunis Qədimbəylinin oğlu Orxan Qədimbəylinin evindən oğurluq etməkdə ittiham olunan Ruzan Cabbarovanın cinayət işi üzrə məhkəmə araşdırması başlayıb.
Cinayət işi Bakı Ağır Cinayətlər Məhkəməsində hakim Səbinə Məmmədzadənin sədrliyi ilə araşdırılır.
İttihama görə, Ruzan Cabbarova Orxan Qədimbəlinin Səbail rayonunda, İçərişəhər ərazisində yerləşən evində xadimə işlədiyi müddətdə onların qızıl-zinət əşyalarını və nağd pul vəsaitlərini oğurlayıb.
Oğurluq nəticəsində Oxran Qədimbəyli və onun həyat yoldaşı Fəridə Qədimovaya ümumilikdə 803 min 118 manat ziyan dəyib.
Təqsirləndirilən şəxs istintaqa verdiyi ifadəsində ehtiyacı olduğu üçün oğurluq etdiyini deyib. O, oğurladığı pul və qızıl-zinət əşyalarının da ittihamda göstərildiyi kimi 803 min 118 min manat deyil, 217 min manat olduğunu bildirib.
Qadın həmin əşyaları yaşadığı Zabrat qəsəbəsindəki evinin həyətində yerləşən torpaq sahəsinə basdırıb. İşin üstü açılandan sonra pul, qızıl və digər əşyaların yerini polislərə özü göstərib.
Oğurluq əşyalar polis tərəfindən tapılaraq sahiblərinə qaytarılıb.
İstintaq orqanı tərəfindən Ruzan Cabbarova Cinayət Məcəlləsinin 177.4 (xüsusi ilə külli miqdarda oğurluq etmək) maddəsi ilə ittiham elan edilib.İş üzrə zərərçəkmiş qismində Orxan Qədimbəyli və onun həyat yoldaşı Fəridə Qədimova tanınıb.Bu gün keçirilən hazırlıq iclasında Ruzan Cabbarova özünü qismən təqsirli bilib.Prosesdə təqsirləndirilən şəxsin vəkili Günay İsmayılova vəsatət qaldıraraq müvəkkili barəsində seçilmiş həbs qətimkan tədbirinin ev dustaqlığı ilə əvəz edilməsini istəyib.Vəsatət təmin olunmayıb.Məhkəmə baxışı dekabrın 20-nə təyin olunub. (Apa)
