Ermənistan Macarıstanla diplomatik münasibətləri niyə bərpa edib?

Tacxeber.com xəbər verir ki, bunu Ermənistanın xarici işlər naziri Ararat Mirzoyan Milli Assambleyada deputat Rüstəm Bakoyanın sualını cavablandırarkən deyib.

Bakoyan xatırladıb ki, ATƏT-in Nazirlər Konfransı çərçivəsində Ermənistan və Macarıstan diplomatik münasibətlərin tam bərpa olunduğunu elan ediblər. Bakoyan Ramil Səfərovun Azərbaycana ekstradisiyası ilə əlaqədar Ermənistanın Macarıstanla münasibətlərini dayandırmasını nəzərə alaraq, bu addımlar və ondan əvvəl baş verən hərəkətlər barədə ətraflı məlumat istəyib. Deputatın, Ermənistanın bu məsələ ilə bağlı mövqeyini dəyişib-dəyişdirməməsi ilə bağlı sualına Ermənistanın xarici işlər naziri belə cavab verib:

“Həqiqətən də belə bir görüş olub və razılıq əldə olunub. Bunu Ermənistan və Macarıstan açıq şəkildə bəyan edib. Qeyd etdiyiniz hadisələrə verdiyimiz qiymət dəyişməyib, yəni Macarıstan hakimiyyəti Ramil Səfərovu Azərbaycana ekstradisiya etməməli idi. Amma bir çox başqa müsbət nümunələr var. Biz Macarıstanın ötən il 5 erməni hərbi əsirini vətənə qaytarmaq səylərini xatırlayırıq. Macarıstan hakimiyyətinin nümayəndələri şəxsən Bakıya gələrək beş hərbi əsiri İrəvana gətirdilər. Düşünürəm ki, Macarıstan hakimiyyətinin koronavirusla mübarizədə dəstəyini görməməzlikdən gələ bilmərik: onlar 100 min doza peyvənd verdilər, bunun sayəsində həyatlar xilas edildi”, – Mirzoyan deyib.

Xatırladaq ki, 2004-cü ildə Budapeştdə erməni zabiti Qurgen Markaryanın qətlə yetirilməsində günahkar bilinən Azərbaycan Ordusunun baş leytenantı Ramil Səfərovun Macarıstandan Azərbaycana ekstradisiya edilməsindən və Bakıda dərhal əfv olunmasından sonra – 2012-ci ilin avqustunda Macarıstanla Ermənistan arasında diplomatik münasibətlər dayandırılmışdı.

Tacxeber.com