“Azərbaycan öz torpaqlarının və təbii sərvətlərinin sahibidir. Çox təəssüf ki, erməni təcavüzkarları havadarlarına arxalanaraq 30 il torpaqlarımızın 20 faizini işğal altında saxlayıb, təbii sərvətlərimizi vəhşicəsinə talayıb, ekologiyamıza ciddi zərbə vurublar. Qələbə qazanmağımıza, torpaqlarımızı azğın düşməndən təmizləməyimizə baxmayaraq Qarabağ ərazilərində məskunlaşan təcavüzkar xislətli ermənilər yenə də öz mənfur məqsədlərini həyata keçirmək niyyətindədirlər. Faydalı qazıntı yataqlarının, xüsusilə Qızılbulaq və Dəmirli mismolibden yataqlarının qanunsuz istismar edilməsi haqlı olaraq xalqımızın kəskin hiddətinə səbəb olub…”

Bu sözləri Pravda.az-a açıqlamasında Milli Məclisin deputatı Tahir Rzayev deyib.

Deputat bildirib ki, təbii ehtiyatların qanunsuz istismarını araşdırmaq məqsədilə İqtisadiyyat Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət monitorinq qrupu yaradılıb:

“Qrupun Xankəndi və Şuşa şəhəri arasındakı nəzarət məntəqəsində, eləcə də Xocalıda Rusiya sülhməramlı kontingentinin komandanlığı ilə görüşüb kəskin etirazını bildirməsi göstərdi ki, Azərbaycan öz torpaqlarının sahibidir və onun razılığı olmadan ərazilərdə heç bir qazıntı aparıla bilməz. Görüşlər zamanı qanunsuz istismarın dayandırılması, müxtəlif istiqamətlər üzrə monitorinq və invertarizasiyanın aparılması, ətraf mühitə dəymiş zərərin qiymətləndirilməsi, aradan qaldırılması və s. məsələlər müzakirə edilib. Bu gün Laçın dəhlizinin tamamilə sülhməramlıların nəzarəti altında olması, istər təbii sərvətlərimizin həmin yolla daşınması, istərsə də həmin istiqamətdə Qarabağda olan separatçılara silah – sursat gətirilməsi, ərazilərimizə xarici ölkə vətəndaşlarının, İran xəfiyyələrinin daxil olması ciddi narahatlıq törədir. Dəhlizdə gömrük keçid məntəqəsinin, nəzarət postunun yaradılması çox vacibdir və bu Azərbaycanın haqqıdır. Çünki həmin ərazilər Azərbaycan torpağıdır və torpaqlarımıza müdaxilə edilməsi yolverilməzdir. Həmin ərazilər mütləq nəzarətə götürülməlidir”.

Tacxeber.com