İrandan növbəti diplomatiya ayıbı – Səfir kraliça Letizia ilə əl sıxmaqdan imtina etdi – VİDEO

İranda 1979-cu il İslam İnqilabından bəri kişilərin ictimai yerlərdə qadınlarla əl sıxmasına icazə verilmir.

Tacxeber.com bildirir ki, İspaniya Kralı və Kraliçası Madrid Kral Sarayında xarici diplomatlar üçün rəsmi qəbul təşkil ediblər. Qəbula dəvət olunan səfirlər və onların həyat yoldaşları ilə əl sıxma on dəqiqəyə yaxın davam etsə də, ayıbsız ötüşməyib. İran səfiri Həsən Qaşqavi kraliça ilə əl sıxmaqdan imtina edib.

Hadisə videoya çəkilib. Qaşqavi kral VI Filippin əlini sıxıb, lakin Letisiyaya məhəl qoymayıb, başını aşağı salıb.

Ümumilikdə isə kral və kraliça 120 səfir və səfirlik katibləri ilə əl sıxıblar. Qəbulda mərkəzi ofisi İspaniyada yerləşən və ya mərkəzi olan 41 beynəlxalq təşkilatın yüksək vəzifəli rəsmiləri də qarşılanıb. Baş nazir Pedro Sançes və xarici işlər naziri Xose Manuel Albares də mərasimdə iştirak edib.

İran səfirinin bu hərəkəti çaşqınlıq yaradıb. İranda 1979-cu il İslam İnqilabından bəri kişilərin ictimai yerlərdə qadınlarla əl sıxmasına icazə verilmir. Ancaq heç kim bunun İspaniya kraliçasının əllərinə də aid olduğunu düşünməyib.

Qəbulda diplomatlar arasında Rusiya və Venesuelanın yeni səfirləri olmayıb, onlar artıq Madriddə olsalar da, ölkəsini İspaniyada rəsmi təmsil edə bilmək üçün lazım olan etimadnamələrini hələ də krala təqdim etməyiblər. Mərasimdə davam edən diplomatik böhran səbəbilə səfirlərinin geri çəkilməsi ilə nəticələnən Nikaraqua nümayəndəsi də iştirak etməyib.