Dördqat dünya çempionu müharibədə həlak oldu

Ukraynanın kikboksinq üzrə dördqat dünya çempionu Vitali Merinov Rusiya ilə müharibədə həlak olub.

Tacxeber.com xəbər verir ki, bu məlumatı İvano-Frankovsk şəhərinin meri Ruslan Martsinkiv Ukrayna mətbuatına verib.

Merin dediyinə görə, 33 yaşlı idmançı martın 30-dan 31-nə keçən gecə, cəbhədə aldığı güllə yarasından sonra xəstəxanada vəfat edib.

Merinov müharibənin ilk günlərindən döyüş bölgəsinə yollanıb.

Mərhum idmançı universal döyüş növləri üzrə Ukrayna çempionu və boks üzrə idman ustası idi.

Rusiya qoşunları ötən il fevralın 24-də Ukraynaya hücuma keçiblər. Bu hücum bütün dünyada kəskin etirazlara səbəb olub. Hücumdan sonra Rusiyaya qarşı bir çox sanksiyalar tətbiq edilməyə başlanıb. Həmçinin, Rusiyanın və onun müttəfiqi olan Belarusun müxtəlif idman növləri üzrə komandaları da qadağalarla üzləşib.