İmtahandan yüksək bal toplayan şagird – “Müəllim yanına getməmişəm”
Tam orta təhsil səviyyəsi üzrə 12 mart 2023-cü il tarixində keçirilmiş buraxılış imtahanının nəticələri elan olunub.
Dövlət İmtahan Mərkəzindən verilən məlumata görə, ən yüksək bal (297.5 bal) toplayanlardan biri Səbail rayon 160 №-li klassik gimnaziyasının şagirdi Mürşüdlü Nəzrin Elxan qızıdır.
Nəzrin öz təəssüratlarını AzEdu.az saytı ilə bölüşüb.
– Yüksək nəticə toplamağınız sizin üçün gözlənilən idi?
– Əslində 270 üzərində nəticə gözləyirdim. 290-dan çox olacağına ümidim var idi, ancaq əmin deyildim.
– Nəticəniz barədə məlumat alanda, hansı hissləri keçirdiniz?
– Belə nəticə əldə etdiyim üçün çox sevindim.
– İmtahana necə hazırlaşırdınız, repetitorlarla çalışmısınız?
– Xeyr, xarici dil olaraq alman və rus dillərindən repetitor yanında hazırlaşmamışam. Məktəb dərslərindən öyrəndiklərim əsasında imtahan verdim. Riyaziyyatdan isə ayrıca Türkiyədə təhsil imtahanı üçün hazırlaşırdım.
Xüsusi olaraq müəllim yanına getməmişəm.
– Sözlərinizə görə, siz xaricdə təhsil almaq istəyirsiniz…
– Bəli, Türkiyədə təhsil almaq istəyirəm. Ancaq hansı universiteti seçəcəyimə hələ qərar verməmişəm.
– Hansı qrupa hazırlaşırsınız?
– I qrup üzrə hazırlaşıram. İstədiyim ixtisas isə komputer mühəndisliyidir.
