Böyük Britaniya Baş nazirinin ticarət elçisi Azərbaycana gəlir

Böyük Britaniya Baş nazirinin ticarət elçisi Baronessa Nikolson Azərbaycana səfərə gəlir.

Bu barədə APA-ya Böyük Britaniyanın Bakıdakı səfirliyindən məlumat verilib.

Bildirilib ki, ticarət elçisi Bakı Enerji Həftəsində iştirak etmək və Böyük Britaniyanın Azərbaycanla iqtisadi əlaqələrin gücləndirilməsinə sadiqliyini vurğulamaq üçün bu gün Azərbaycana dördgünlük rəsmi səfər edəcək.

Baronessa Nikolson səfəri çərçivəsində energetika naziri Pərviz Şahbazov, mədəniyyət naziri Anar Kərimov, parlamentin sədri Sahibə Qafarova, enerji, tikinti və səhiyyə şirkətlərinin nümayəndələri ilə görüşəcək. O, işğaldan azad edilən ərazilərin bərpasında əməkdaşlıq imkanlarını müzakirə etmək üçün Prezidentin Zəngilan, Qubadlı və Cəbrayıl rayonları üzrə xüsusi nümayəndəsi Vahid Hacıyev və Prezidentin Şuşa üzrə xüsusi nümayəndəsi Aydın Kərimovla da görüşəcək.

Səfər zamanı Baronessa Nikolson Azərbaycanın enerji bazarı imkanlarını və enerji keçidini müzakirə etmək üçün “Baku Connect Event”də də iştirak edəcək. O, həmçinin Bakı Enerji Həftəsi və Bakı Enerji Forumunda da iştirak edəcək.

Tacxeber.com