Təl-Əvivə qədər vuruldu: İran İsraildən bunun qisasını alır

  HƏMAS-ı İran maliyyələşdirir, bu hücumun da əsas səbəblərdən biri Təl-Əvivin Səudiyyə Ərəbistanı ilə barışmaq niyyətidir.

Bu sözləri Axar.az-a güneyli jurnalist və milli fəal Əli Süleymani deyib.

İsrailin son günlər ərəb ölkələri ilə dostluq münasibətinə can atmasının Tehran rejimini qıcıqlandırdığını vurğulayan Süleymani bildirib ki, İran müsəlman dünyasında nüfuzunun itirilməsindən ehtiyat edir:

“İsrailə hücumun miqyası böyükdür. Təl-Əvivə kimi raket zərbələri endirməklə İsrailin başını qatmaq istəyirlər. Hərtərəfli hücum sadə bir həmlə deyil və barışığın qarşısını almağa yönəlib. Səudiyyə Ərəbistanı ilə İsrailin barışması Tehran hökumətinə böyük zərbə sayıla bilər. Hətta İran rəsmiləri və Xamenei bu barışığı “islam dünyasına xəyanət” adlandırmışdı. Xameneinin ötən gün İsrailə təhdidedici mesajını da gözardı etməməliyik. İsrailin İranın qonşuları ilə yaxşı münasibətləri yaranıb. Azərbaycan və Türkmənistandan sonra Ərəbistanla da Təl-Əviv dostluq əlaqələrini gücləndirsə, İran rejimi özünü təhlükədə hiss edəcək. Həmçinin, Ərəbistan islam dünyasının mərkəzidir. Belə bir dövlətlə barışmaq Təl-Əviv üçün də önəmlidir. İsrail ərəb ölkələri ilə əlaqələrini normallaşdırarsa, İran təcrid olunacaq”.

Əli Süleymani bu yaxınlarda İsrailə məxsus PUA-ların İran daxilində uçuşlar həyata keçirərək, bəzi gizli hərbi obyektlərə zərbə endirməsi faktını da xatırladıb:

“İsrail İranın Kirmanşahda dağların altında yerləşən hərbi hissələrinə hava zərbələri endirdi. Bu isə İran üçün istər maddi, istərsə də mənəvi itki idi. Tehran rejimi bir növ bu hücumun qisasını HƏMAS vasitəsi ilə almış oldu. İsrailə, hətta Təl-Əvivə əks-həmlə etməklə müharibəni İsrailin daxilinə yönəldir. Həmçinin İsrail cəmiyyətində qorxu yaratmağa çalışır”.

http://Tacxeber.com