“Həkim dedi ki, ayağı kəsilməlidir, dedim ki, qorxma Emil, səni atmayacam”-Sabrina Emilin son günündən danışdı-FOTO

-Emilin ən pis cəhəti nə idi?

-Çox səbrsiz idi. Bəlkə də onun pis xasiyyətləri olub, amma mən unutmuşam. Çünki Emili yaxşı xatırlamaq istəyirəm.

-Həyatda ən çox sözünü dinləyən insanlardan biri də siz olmusunuz. 

-Bəli, sözümə çox baxırdı, dinləyirdi. Bir həyat yoldaşı kimi yox, sanki bir anası idim. Özünü sındıran deyildi, deyirdi ki, xoşlamıram ki, kişi qadın sözü ilə oturub-dursun, amma son məqamda yenə də mənim sözümə gəlirdi.

-Övladınızın olmaması sizin münasibətlərinizdə soyuqluq yaratmırdı ki? 

-Əlbəttə ki, övlad istəyirdi. O mənim qızım Zəhranı öz balası kimi əzizləyirdi. Emil üçün fərq etmirdi ya öz bioloji qızı, ya da mənim qızım. Sonuncu dəfə dedi ki, müalicədən çıxmışam, təmizəm, özümə güvənirəm. Nə barədə? O həmişə qorxurdu ki, etdiyi səhvlər uşağa nəsə zərər verər və s. O çox düşüncəli insan idi. Hətta məndən də çox!  Deyirdi ki, oğlum olsa Rəhman, qızım olsa Rüqəyya adını qoyacam. Mənim qızıma elə atalıq etmişdi. Zəhra 7-8 aylıq olanda gözünü açıb elə onu görmüşdü.

-Sabrina xanım, Emilin son günlərini necə xatırlayırsınız?

-O günü heç unuda bilmirəm. 2-3 gün idi evdə dincəlirdi, sentyabrın 21-də Gəncəyə toya getməli idik. 18-də dedi ki, ayağım ağrıyır. Gördüm ki, ayağının üstü şişdir. Rəngi də boğulmuşdu. Əlimi vurdum bədəninə gördüm ki, bumbuzdur. Həmişə əli-ayağı isti olurdu. Təcili tibbi yardım çağırdım. Dedilər ki, təzyiqi aşağıdır. Həkim aparmaq istəyəndə getmədi. Çay-çörək verdim, yeyib yatdı. Dostunu çağırdım ki, mənə kömək etsin, onu həkimə aparaq. Birtəhər evdən çıxarıb həkimə apardıq. İynə-dərman etdilər, təzyiqi yenə də aşağı oldu. Həkim dedi ki, ayağı kəsilməlidir. Etiraz edəndə dedim ki, Emil, elə bilirsən ayağın kəsiləndə səni atacam?! Bir az zarafat etdim onunla. İstəyirdim ki, əhval-ruhiyyəsi yaxşı olsun. Getdik, həkim dedi ki, artıq tromblaşıb. Həkim onu əməliyyata da almadı. Deyirdim ki, təki Emil yaşasın, evimi-eşiyimi də sataram. Bir az ümid yeri istəyirdim. Həkim dedi ki, hara istəyirsiz aparın, artıq əməliyyatlıq deyil, gedin hazırlığınızı görün. Çox keçmədi ki, Emili itirdik (ağlayır).

-Emili itirəndən sonra sizi dəstəksiz, tək buraxan dostları oldumu?