Böyük fırıldaqçılıq, yoxsa ağıllı ideya? – Daş satmaqla milyonçu oldu
1975-ci ilin sonunda amerikalı Gary Dahl topdan qəpik-quruşa, pərakəndə isə 3,95 dollara satılan adi daşların ticarəti ilə milyoner olub.
Amerikalı Gary Ross Dahl həm marketinq dahisi, həm də parlaq fırıldaqçı adlanır. O, ilk dəfə “Pet Rock” icad edib. Onun ideyası “gülməli dərəcədə uğurlu marketinq sxemi” adlandırılıb. Bu, adi kopirayterin milyonçu olmasına şərait yaradan bir sxem idi.
“Pet Rock” şirkəti bazarda beş ildən bir qədər çox mövcud olmasına baxmayaraq, yaradıcısını milyoner edib. “Pet Rock”un uğuru 1975-ci ildə, Amerikanın oyuncaqlar və digər “mənasız” hədiyyələr üçün çılğınlıq dövrünə təsadüf edir. Dahlın uğurunda isə məhsulun özü deyil, qablaşdırma üsulu mühüm rol oynayıb. Dahl, əslində, daşlardan deyil, qablaşdırmada istifadə edilən karton qutudan zəngin olub.
Həmin illərdə Dahl Kaliforniyada müstəqil reklam kopirayteri kimi çalışırdı. Sahibkarın özünün dediyi kimi, “Pet Rock” yaratmaq ideyası dostları ilə barda görüşlər zamanı yaranıb. Dahlın dostları pişik və itlərinin mebelləri necə məhv etdiyini və ev heyvanlarına qulluq etməyin nə qədər çətin olduğunu müzakirə edirdilər. Dahl bir dəfə zarafatla,narahatlıq üçün heç bir əsas olmadığını bildirib.
O, bütün problemləri həll edən “daşı” olduğunu iddia edib.
Hamı gülsə də, Dahl adi zarafatı daha da irəli aparmağı qərara alıb. Evə gəldikdən sonra o, ev heyvanı saxlayanlar üçün bir təlimat yazmağa başlayıb. Bu təlimatda heyvanla ən yaxşı şəkildə necə davranmaq, hansı fəndləri yerinə yetirmək, necə sadiq yoldaş olaraq qala bilmək izah edilirdi.
Təlimatı tamamlamaq üçün Dahl zoo mağazalarda istifadə olunanlara bənzər havalandırma dəlikləri olan karton qutu hazırlayıb.
Dahl qeyri-adi ideyasını həyata keçirməkdə maliyyə cəhətdən çətinlik çəkib. Ona iki həmkarı, Corc Koakli və Con Heqerti kömək edib.
Daha sonra Dahl ilk qutusundakı Meksika çimərlik daşlarının hər birini bir sentdən də az qiymətə alıb. O, hər daşı gözəl şəkildə qablaşdırıb və öz dəyərlərindən qat-qat baha qiymətə satıb.
Dahl məhsulunu ilk dəfə 1975-ci ilin avqustunda San-Fransiskoda keçirilən hədiyyə sərgisində təqdim etdi. “Pet Rock” 1975-ci il Milad bayramında bazara çıxdı, şou-proqram və qəzet məqalələrində nümayiş olundu.
Cəmi bir neçə ayda bir milyona yaxın daş satıldı. Dahlın sözlərinə görə, bu cür satışlarla o, “axmaq insanlar üçün iqtisadiyyat”ın olduğunu sübut etdi.
Dahl “Pet Rock” uğurunu təkrarlaya bilməsə də, heç vaxt müflisləşmədi.
Dahl “Pet Rock” ticarət markasının ömrünü uzatmaq üçün cəhdlər etsə də, heç nəyə nail ola bilmədi. 1976-cı ildə Amerika bayrağı ilə bir versiya çıxardı, “Pet Rock” köynəkləri və şampunu da satdı.
