Azərbaycan və Ermənistanın razılaşmasına əsasən dünən hərbçilərin dəyişdirilməsi başa çatdı.

Tacxeber.com xəbər verir ki, bu ilin aprel ayında azaraq Ermənistan sərhədini keçən əsgərlərimiz Hüseyn Axundov və Aqşin Bəbirov Bakıda həbsdə olan 32 erməni hərbçisi ilə dəyişdirildi.

Bu dəyişdirilmədən sonra Azərbaycanda əsas müzakirə mövzularından biri Ermənistanda nə qədər əsirimizin qalmasıdır. Eyni müzakirə Ermənistanda da aparılır, onlar Azərbaycanda saxlanılan erməni hərbçilərin sayını dəqiqləşdirməyə çalışırlar.

H.Axundov və A.Bəbirovun azad edilməsi ilə Ermənistanda Azərbaycan hərbçisi qalmadı. 44 günlük müharibədə və sonrakı dövrdə çox az sayda hərbçimiz əsir düşmüşdü və onların hamısı azad edilib.

Azərbaycanda saxlanılan erməni hərbçilərin olduğu isə sirr deyil. 44 günlük müharibədə onminlərlə fərarisi olan erməni ordusundan həm də çoxsaylı əsir götürülmüşdü, onların bir çoxu ordumuzun qarşısında döyüşə bilmədiyi üçün silahı yerə qoyub təslim olmuşdu. Müharibədən sonra əsirlərin dəyişdirilməsi prosesində əksəriyyəti Ermənistana qaytarıldı. Lakin müharibədən sonra Azərbaycanın dəfələrlə xəbərdarlıq etməsinə baxmayaraq, Ermənistan Qarabağa hərbçi göndərməkdən əl çəkmədi. Ordumuzun keçirdiyi antiterror tədbirləri nəticəsində onlarla erməni hərbçisi saxlanıldı. Bununla yanaşı, Ermənistanın sərhəd təxribatları zamanı da saxlanılan erməni hərbçilər olub. Onların bir çoxu təhvil verilsə də, hələ də qalanlar var. Bakıda saxlanılan erməni hərbçilər müharibə əsiri yox, Azərbaycan sərhədləri daxilində qanunları pozmuş şəxslərdir, aralarında hətta xarici ölkədən, misal üçün, Livandan olanlar da var.

Ermənistan mediası hüquq müdafiəçilərinə istinadən Bakıda 80 erməninin saxlanıldığını iddia edir. Bu rəqəmlər nə Azərbaycan, nə də Ermənistanın rəsmi açıqlamalarında əksini tapımayıb və sadəcə iddiadan ibarətdir. Hətta bəzi erməni resursları saxlanılanların yüzlərlə olduğu iddiasını da irəli sürür. Rəsmi İrəvan isə Azərbaycanda hələ də 23 erməni hərbçinin qaldığını iddia edir. Bütün bu iddialar rəsmi Bakı tərəfindən təsdiq olunmayıb. Hərbçilərin son mübadiləsində bizim üçün ən vacib məqam Ermənistanda heç bir əsirimizin qalmaması idi və buna nail olundu.

Tacxeber.com