Moskvanın Basmannı məhkəməsi Ukrayna Təhlükəsizlik Xidmətinin (SBU) rəhbəri Vasili Malyukun barəsində qiyabi həbs qərarı qəbul edib.

Tacxeber.com xarici mediaya istinadən xəbər verir ki, məhkəmə SBU rəhbərini Cinayət Məcəlləsinin 205-ci maddəsinin 3-cü hissəsi “b” bəndi üzrə terror aktı törətməkdə ittiham edib.

Bu maddə 15 ildən 20 ilədək azadlıqdan məhrum etməni nəzərdə tutur. Həbs müddəti onun Rusiya Federasiyasının ərazisinə ekstradisiya edildiyi andan və ya Rusiya ərazisində saxlandığı andan hesablanır.

Malyuk federal və dövlətlərarası axtarışa verilib.

Qeyd edək ki, bundan öncə o, rəhbərlik etdiyi idarənin bəzi Ukrayna və Rusiya siyasətçiləri və ictimai xadimlərinin, məsələn, hərbi müxbir Vladlen Tatarskinin və Ali Radanın keçmiş deputatı İlya Kivanın qətllərində və həyatına sui-qəsdlərdə iştirakına eyham vursa da, bunu rəsmən təsdiqləməyib. Ukrayna telemarafonunda çıxışında o, demişdi ki, SBU İlya Kiva və Vladlen Tatarskinin qətlində iştirakını təsdiqləməyəcək. O, Kivanı öldürmək üçün istifadə edilən silah və hərbi müxbir Tatarskiyə bağışlanan büstdə yerləşdirilən partlayıcı maddələr haqqında ətraflı məlumat verib.

Tacxeber.com