Süni intellektin tətbiqi xərçəngin aşkarlanmasını tezləşdirə bilər
Süni intellekt sisteminin tətbiqi xərçəngin aşkarlanma sürətini artırır.
Tacxeber.com “Radiology” tibb jurnalına istinadla xəbər verir ki, Danimarkada süd vəzi xərçəngi üzrə tədqiqatların nəticələri bunu göstərir. Tədqiqat sübut edir ki, süni intellekt əksər mamoqrammaların təkrar oxunmasına ehtiyacı azalda bilər. Bu həm radioloqların iş yükünü azaldır, həm də mənfi-müsbət halları tam aydınlıqla aşkara çıxara bilir.
Danimarkanın Kopenhagen Universitetinin Kompüter elmləri departamentinin əməkdaşı Andreas Lauritzen bildirib ki, süni intellekt radioloqların işini üzərinə götürmür: “Əksinə, bu, onlara vaxlarını daha səmərəli işlərə ayırmağa kömək edir, yüksək riskli skrininqlərə və ya müəyyən xəstələr üçün diaqnostik tapşırıqlara diqqət yetirmək üçün vaxt sərfindən azad edir. Nəticələr isə erkən aşkarlamaya imkan verir”.
Kaliforniya Universitetinin dosenti Ami Li və Şimal-Qərb Universitetinin Feinberq Tibb Məktəbinin dosenti Sara Fridevald bildiriblər ki, mamoqrammaların yoxlanmasına ikiqat oxuma yanaşması dəqiqliyi təmin etsə də, iş yükünü və kadr problemini artırır. Onlar onilliklərlə klinik istifadədə olmasına baxmayaraq, kompüter dəstəkli aşkarlamanın dəqiqliyində heç bir irəliləyiş olmadığını xatırlayıblar: “Qıvrımlı neyron şəbəkələrinə əsaslanan müasir süni intellekt sistemləri kompüter dəstəkli aşkarlamadan üstün olsa da, eyni səhvlərin təkrarlanmasına yol vermək olmaz”.
