Trampdan BRİCS-ə xəbərdarlıq.

“Biz bu ölkələrdən nə yeni bir BRİCS pul vahidi, nə də güclü ABŞ dollarının yerini tutacaq başqa pul vahidini dəstəkləyəcəklərinə dair təəhhüd gözləyirik. Əks təqdirdə, 100%-lik gömrük vergisiylə qarşı-qarşıya qalacaqlar və möhtəşəm ABŞ iqtisadiyyatına satışlardan vaz keçmələri lazım gələcək. Gedib başqa bir axmaq tapsınlar! BRİCS-in beynəlxalq ticarətdə ABŞ dollarını əvəz etməsi mümkün deyil, buna cəhd edən hər hansı ölkə ABŞ-la əlaqələrə əlvida deməlidir”, – deyə Tramp sosial media hesabında yazıb.

Məlumdur ki, BRİCS vahid valyutasının yaradılması məsələsində ən çox canfəşanlıq edən Rusiyadır. Bu məsələ təşkilatın oktyabrdakı Kazan zirvə toplantısında müzakirə olunsa da, hər hansı razılıq əldə edilməyib.

Yeri gəlmişkən, xatırladaq ki, Azərbaycan və Türkiyə BRİCS-ə qoşulmaq üçün müraciət etsələr də, Kazanda müsbət cavab ala bilmədilər. Qeyri-rəsmi məlumatlara görə, Hindistan buna razılıq verməyib. (Türkiyə yalnız tərəfdaş ölkə statusu aldı).

Ümumiyyətlə, BRİCS həddən artıq şişirdilmiş bir təşkilatdır. Halbuki o, qarşılıqlı öhdəliklərlə bir-birinə bağlı olan dövlətlərin inteqrativ birliyi, ittifaqı, bloku deyil, nə Nizamnaməsi var, nə rəhbər orqanları. Bu baxımdan Rusiya mətbuatı başda olmaqla, dünya mediasında BRİCS-də təmsil olunan dövlətlərin iqtisadiyyatlarının ümumi həcmini, əhalisinin sayını və digər göstəricilərini toplayıb, ortaya iri rəqəmlər qoyulması və bunların G7, ABŞ və Aİ ilə müqayisəsi baş aldatmaqdır. Toplam 2,8 milyard nəfər əhalisi olan Çin və Hindistanın nominal ÜDM-i əlbəttə ki, böyük olacaq. Amma bu dövlətlərin göstəricilərini kağız üzərində birləşdirməyin mənası yoxdur, onlar aralarında kifayət qədər ciddi problemlər olan regional rəqiblərdir.