Bu gün bütün dünya ondan danışır… Keçmiş göz həkimi, Suriyanın devriləndən sonra Moskvaya qaçan prezidenti Bəşər Əsəddən…

Suriyada əsrin təxminən dörddə biri qədər hakimiyyətdə qalan Bəşər Əsəd müxtəlif xarici səfərlərdə olub. O cümlədən də Azərbaycana gəlib.

Modern.az saytının “Bir şəklin tarixçəsi” rubrikasında təqdim etdiyi bu nadir fotoşəkil də Bəşər Əsədin Azərbaycan səfərini əks etdirir.

Zaman 2009-cu ilin iyul ayı, məkan Azərbayan Milli Məclisi…

Suriya prezidenti Bəşər Əsəd ölkəmizə rəsmi səfər edib. O zaman Suriya rəhbəri hələ yüz minlərlə insanın ölümünə səbəb olan “əcinnə” sayılmırdı. Oftalmoloq (göz həkimi) olmaq üçün tibbi təhsil alan Bəşər Əsəd 2000-ci ildə atası Hafiz Əsədin ölümündən sonra prezident seçilmişdi. O, ölkəsində islahatlar aparacağını vəd etmişdi.

Bəşər Əsəd Bakıya səfər edəndə hakimiyyətə gəlişindən 9 il ötürdü. O, perspektivli və Qərbyönlü gənc lider kimi təqdim olunurdu.

Parlamentdə Bəşər Əsədi Azərbaycan-Suriya dostluq qrupunun o zamankı rəhbəri, deputat Cavanşir Paşazadə (Qafqaz Müsəlmanları İdarəsinin sədri şeyxülislam Allahşükür Paşazadənin qardaşı-red.) və Milli Məclis Aparatının rəhbəri Səfa Mirzəyev qarşılamışdı.

2009-cu ildə Suriya prezidenti Bəşər Əsədin Azərbaycana iki günlük rəsmi səfəri 8-9 iyulda gerçəkləşmişdi…

Lakin o, Suriyada vəd etdiyi islahatları gerçəkləşdirmədi. Suriyada Bəşər Əsədə qarşı xalq hərəkatı 2011-ci il martın 15-də ölkənin cənubundakı Dera şəhərində bir qrup tələbənin məktəbin divarına “Ey həkim, növbə sənindir!” yazması ilə başlayıb. O günlər ərəb ölkələrində liderlərin devrildiyi “ərəb baharı” günləri idi. O vaxtdan bəri 13 ildir milli barışıq yolunda önəmli addımlar atmayan Bəşər Əsədə vəd olunan növbə çatdı… Devrilən prezident İran və Rusiya kimi himayədarlarından dəstək olmayanda çarəni ölkəsini tərk edib qaçmaqda gördü…

Tacxeber.com