İsrailin müdafiə naziri İsrael Katz İsrail ordusuna İsrail və Suriya arasındakı bufer zonada tam nəzarəti təmin etməyi əmr edib.

Tacxeber.com The Times of Israel-ə istinadla xəbər verir ki, hərbçilərə Suriyanın cənubunda, o cümlədən bufer zonadan kənarda, strateji silahlardan və İsraili təhdid edə biləcək terror infrastrukturundan təmizlənmiş təhlükəsiz sektor yaratmaq tapşırılıb.

Nazirin digər tapşırıqları arasında Suriyanın cənubundakı druzlar və digər icmalarla əlaqə yaratmaq və Suriya ərazisindən İrandan Livana silah qaçaqmalçılığının bərpası cəhdlərinin dərhal qarşısını almaq da var.

Katz hərbçilərin qarşısına Suriyada düşmən qüvvələrin əlinə keçə biləcək ən təsirli silahları məhv etmək vəzifəsini qoyub. Nazir onların arasında hava hücumundan müdafiə sistemlərini və zenit raketlərini, yer-yer raketlərini, qanadlı raketləri, uzaq mənzilli raketləri və yerdən buraxılan gəmi əleyhinə raketləri sadalayıb.

Bazar günü İsrail Hərbi Hava Qüvvələri İsrailə düşmən olan qüvvələrin silah əldə etməsinə mane olmaq məqsədilə Suriyada onlarla hədəfə zərbələr endirib. Hədəflər arasında hava hücumundan müdafiə sistemləri, müasir raketlər üçün anbar yerləri və silah istehsalı obyektləri ola bilər.

Tacxeber.com