Zibilliyə atdığınız köhnə telefonlarınızdan kiçik bir sərvət qazana bilərsiz
Bir vaxtlar texnoloji ilə ayaqlaşmayan cihazlar diqqətsiz şəkildə zibilə atılsa da, indi keçmişdə dövrü keçmiş sayılan bir çox məhsul yüksək dərəcədə tələb görür. Köhnə oyun konsollarından tutmuş köhnə kompüterlərə və xüsusən də mobil telefonlara qədər retro texnologiya məhsulları üçün inkişaf edən bir bazar mövcuddur.
Tacxeber.com Qaynarinfo-ya istinadən xəbər verir ki, bəzi köhnə mobil telefon modelləri sadəcə keçmişin qalığı olmaqla kifayətlənməyib, həm də dəyərli kolleksiya əşyalarına çevriliblər. Texnologiya həvəskarları və nostalji məhsulları axtaran alıcılar üçün bu cihazlar müasir telefonlardan daha çox məna ifadə edir. Bu telefonlardan birinə sahib olmaq, texnologiya tarixinin bir parçasına sahib olmaq deməkdir.
“Motorola DynaTAC 8000” və digər retro modellər
Keçmişdə böyük məbləğlərə satılan bəzi modellər bu gün də yüksək qiymətlərlə alıcı tapır. Məsələn, 1983-cü ildə bazara çıxarılan “Motorola DynaTAC 8000” öz dövrünün qabaqcıl cihazlarından biri idi. Həcmcə böyük və qiymət baxımından baha olan bu model, ilk mobil telefon kimi tarixə düşüb. 4 min ABŞ dollarına satılan bu cihaz (indiki məzənnə ilə təxminən 12 min dollar) əsasən iş adamları tərəfindən istifadə olunurdu.
Bu gün “DynaTAC 8000” kolleksiyaçılar arasında ən çox axtarılan modellərdən biridir. Onlayn platformalarda, vəziyyətinə görə 2 min dollardan çox qiymətə satılır. Əgər köhnə əşyalarınız arasında belə bir cihaz taparsınızsa, onu sataraq ciddi gəlir əldə edə bilərsiniz.
“DynaTAC 8000” ilə yanaşı, daha yeni modellər də kolleksiyaçılar tərəfindən maraqla qarşılanır. Məsələn, 2009-cu ildə satışa çıxarılan “HTC Touch Diamond2” “Windows Mobile 6.1” əməliyyat sistemi ilə təchiz edilmiş və hazırda 650 dollara qədər qiymətləndirilir.
“Apple” və “Nokia” modelləri də yüksək qiymətləndirilir
2007-ci ildə buraxılan ilk “iPhone” modeli də texnologiya tarixində əhəmiyyətli yer tutduğundan yüksək qiymətlərə satılır. “Apple” cihazları həmişə kolleksiyaçılar üçün cəlbedici olub, xüsusən də orijinal vəziyyətini qoruyan modellər daha yüksək qiymətə alıcı tapır.
“Nokia” modelləri də geniş maraq görür. “Nokia 7280”, “Nokia 8110” və “Nokia N79” kimi modellər kolleksiya bazarında xüsusi tələbatla qarşılanır. İkonik “Nokia 6310” mobil texnologiyanın yüksəlişindən əvvəl dövrü əks etdirən bir model olaraq yaddaşlarda qalıb.
Satışdan əvvəl nələri nəzərə almaq lazımdır?
Köhnə telefonlarınızı satmazdan əvvəl onların vəziyyətinə diqqət yetirin. Zədələnmiş və ya natamam cihazlar daha az dəyərli ola bilər. Xüsusilə orijinal qutusu, şarj cihazı və digər aksesuarları olan modellər daha yüksək qiymətə satılır.
