“Rusiya Azərbaycan Prezidentinin səsləndirdiyi şərtləri yerinə yetirəcək” – Sergey Markov
“Biz Rusiya tərəfindən bir neçə səviyyədə faciəyə reaksiyaları gördük.
Azərbaycan tərəfi hesab edir ki, təyyarə Rusiyanın hava hücumundan müdafiə sistemi ilə vurulub.
Azərbaycan Çeçenistanın hava məkanında “Xalça” rejiminin tətbiqi ilə bağlı AZAL təyyarəsini operativ şəkildə xəbərdar etməyən Rusiya rəsmiləri arasında koordinasiyanın olmadığını gördü.
Yaranmış vəziyyətdə Rusiya rəsmiləri arasında konstruktiv reaksiyalar zəncirinin olmaması və bəzi rusiyalı şəxslərin hərəkətləri nəticəsində Rusiya-Azərbaycan münasibətlərində ciddi böhran yaranıb.
Yəni, əvvəlcə Rusiya Azərbaycana qarşı düzgün davranmadı”.
Bizim.Media xəbər verir ki, bu fikirləri Rusiya Siyasi Araşdırmalar İnstitutunun direktoru Sergey Markov AZAL-ın Bakı-Qroznı reysi ilə uçan təyyarəsinin qəzaya uğraması ilə bağlı ağır faciədən sonra Rusiya-Azərbaycan münasibətlərinin nizamlanması perspektivlərini “Moskva-Baku.ru” ya şərh edərkən deyib.
Onun sözlərinə görə, Azərbaycan hesab edir ki, Rusiya dost ölkə, strateji tərəfdaş və müttəfiq kimi ilk gündən öz dövlət rəsmiləri və strukturlarının günahını etiraf etməli idi:
“Amma bu, edilməyib və Azərbaycan tərəfinin qəzəbinə səbəb olub. Bundan başqa, Rusiya rəsmilərinin təyyarə qəzası ilə bağlı bəzi alternativ versiyalar irəli sürməsi Azərbaycan tərəfini qıcıqlandırıb. Mən deyərdim ki, həqiqətən bu vəziyyətdə Azərbaycan tərəfi daha haqlıdır. Hadisədən bir müddət sonra Rusiya Təhlükəsizlik Şurasının iclası keçirilib və orada prezident Vladimir Putinin iştirakı ilə bu vəziyyət müzakirə edilib. Görüşdən sonra Vladimir Putin Azərbaycan prezidenti İlham Əliyevə zəng edərək faciəyə görə üzr istəyib. Əslində, Vladimir Putin bununla da faciəyə görə Rusiyanın məsuliyyətini etiraf etdi və vəziyyəti qismən düzəltdi.
Bu, Bakı tərəfindən qəbul edilib. Amma Moskvanın bu faciədə vaxt itirməsi fakt olaraq qalır. Azərbaycan tərəfi bu üzrü daha əvvəl gözləyirdi.
İlham Əliyev bəyan edib ki, söhbət yalnız Rusiyanın faciəyə görə məsuliyyətini etiraf etməsi ilə yekunlaşmır, Moskva həmçinin müvafiq strukturlarının günahını etiraf etməli, təqsirkarları cəzalandırmalı, eləcə də Azərbaycana təzminat ödəməlidir. Rusiya tərəfində bu şərtlər yerinə yetirilməyib. Ən azından biz bunu açıq şəkildə eşitməmişik”.
Sergey Markov əlavə edib ki, faciə ilə bağlı beynəlxalq təhqiqat 30 gün ərzində tamamlanmalı, yekun nəticələr isə 12 ay ərzində hazır olmalıdır:
“Rusiya bununla bağlı konstruktiv addımlar atır, Azərbaycanın istintaqda iştirakına razılıq verib. Bu, şəffaflığın təmin edilməsi, təbii ki, həm də Azərbaycanla dostluğu qorumaq üçün edilib. Rusiyanın səhvlərini düzəltmək imkanı var. Belə bir deyim var ki, faciə əsl dostları ayırmır, birləşdirir. Ona görə də, Rusiya vəziyyəti düzəltmək üçün hər şeyi etməlidir.
Mən tam əminəm ki, Rusiya Azərbaycan Prezidentinin səsləndirdiyi şərtləri yerinə yetirəcək. Bu, Əliyevin ultimatumu deyil, daha çox zərərçəkmiş tərəfin faciədə günahkar olan tərəfdən obyektiv tələbidir. İndi çoxları faciədən öz məqsədləri üçün istifadə edirlər. Xüsusilə Qərbdə.
Anti-Rusiya qüvvələri ümumiyyətlə, bu faciədən hədsiz sevinirlər. Ona görə Rusiya hələ də təyyarə qəzası ilə bağlı hansı bəyanatların ictimaiyyətə açıqlanması məsələsinə, xüsusən də rəsmilərin açıqlamalarına nəzarət etməlidir.
