Fatih Terimdən dünya futbolunu şoka salacaq TƏKLİF
“Əl Şabab”-ın baş məşqçisi Fatih Terim maraqlı açıqlaması ilə gündəmə gəlib.
Tacxeber.com türk mediasına istinadən xəbər verir ki, o, futbol dünyasını yenidən şəkilləndirə biləcək təklif irəli sürüb. Sarı vərəqə cəzası ilə bağlı danışan mütəxəssis oyunçunun vərəqə cəzasını çəkəcəyi matçın klub tərəfindən müəyyən edilməli olduğunu bildirib. Bu qaydanın tətbiqinin futbolsevərlərin sevimli oyunçularını ən yaxşı matçda izləmələrinə imkan yaradacağını qeyd edib.
“Bir mövsüm ərzində 4 və ya onun qatına çatan sarı vərəqə sayına çatmış futbolçular cəzalarını komandalarının növbəti 4 matçından birində çəkə bilərlər. Oyunçunun bu cəzanı hansı matçda çəkəcəyini öz klubu müəyyən etməli, Futbol Federasiyasına isə bu barədə matçın ertəsi günü məlumat verilməlidir. Əgər bu vəziyyət 4 həftə qalmış baş verərsə, qalan matçlardan biri seçilər. Bu, hər kəsin məmnun olacağı və heç kəsin şübhə altında qalmayacağı bir nümunə olar. Beləliklə, hakimlər də təzyiqdən təsirlənmədən daha rahat şəkildə matç idarə edərlər”.
