Əhval-ruhiyyəyə təsir edən mikrofloranın çatışmazlığı…
“Bağırsaqların vəziyyəti və onlarda yaşayan mikrobiota əhval-ruhiyyəyə təsir edərək, narahatlıq və depressiyaya səbəb ola bilər”.
Tacxeber.com xəbər verir ki, bunu həkim-toksikoloq Mixail Kutuşov “MIR24.TV”yə bildirib. Onun sözlərinə görə, “bağırsaq-beyin oxu” adlı ayrıca tədqiqat sahəsi var.
“Bağırsaq-beyin oxu” adlanan bu tədqiqat sahəsi bu iki müstəqil görünən sistem arasında təəccüblü qarşılıqlı təsir mexanizmlərini ortaya qoyur”, – həkim qeyd edib.
Həkim vurğulayıb ki, bağırsaq mikrobiotasındakı disbalans (disbioz) iltihaba, bağırsaq baryerinin pozulmasına, bağırsağı beyinlə birləşdirən siqnal yollarında dəyişikliklərə səbəb ola bilər. Bu, əhval-ruhiyyəni və emosional sabitliyi tənzimləyən nörotransmitterlərin istehsalına təsir göstərə bilər.
Tədqiqatlar göstərir ki, narahatlıq və depressiyadan əziyyət çəkən insanlarda faydalı bakteriyaların müxtəlifliyi azalır və patogen mikroorqanizmlərin sayı çoxalır: “Bununla belə, mikrobiotanın rolunu başa düşmək üçün genetika və həyat tərzi kimi digər amillər də nəzərə alınmalıdır”, – deyə Kutuşov əlavə edib.
