Bildiyiniz kimi, 12 ildir Niderlandda yaşayıram. Qızımın 10 yaşı var və bu 10 ildə cəmi 1 dəfə, 6 aylıq olanda, Azərbaycanda olub. Amma buna baxmayaraq, İlham Əliyevin yürütdüyü avtoritar siyasi idarəetmə Azərbaycanda doğulmayan qızımın da həyatına təsir edib. Bu statusda bu təsirin nədən ibarət olduğunu qısa göstərməyə çalışaram. Sizdən ricam da budur ki, bunu oxuyub bir az düşünəsiz. Bu hakimiyyətin sizin həyatınıza təsirini qısa olaraq şərh yerinə yaza bilərsiz.
1. Qızım holland dilini mükəmməl bilir, biz isə Azərbaycan dilini. Onunla ailədə Azərbaycanca danışırıq. Lakin İlham Əliyevin yürütdüyü siyasət nəticəsində Azərbaycan dili, bu dildə yazılan nağıllar, cizgi filmlər və uşaqlar üçün əlavə materiallar olmadığı üçün qızımın Azərbaycan dili səviyyəsi çox bəsit məişət səviyyəsindən kənara çıxmır. Çünki, bu dildə uşaqları azad düşündürə bilən nağıl kitabları oxuya, cizgi filmlər və kinolara baxa bilmir. Nəticədə o, mükəmməl hollandca danışır, amma fikirlərini bizə izah etməkdə çətinlik çəkir.
Qızım deyir, mən ana olsam öz uşağımla hollandca danışaram ki, uşağım mənə hər şeyi deyə bilsin. Azərbaycanda doğulmayan və orada yaşamayan biri İlham Əliyevin yürütdüyü siyasət nəticəsində valideynləri ilə normal kommunikasiya qura bilmir.
2. Dil probleminə görə nənə-babaları ilə də dərin ünsiyyəti alınmır. Danışıqları salam-sağoldan kənara çıxmır və uşaq, bu unsiyyətdən də kənar qalır.
3. Heç bir uzaq qohumlarını tanımır və böyük bir qohum-əqrabaya sahib olduğunu da bilmir (bunu hiss etmir).
4. Nənə-babaları ilə istədiyi zaman görüşüb zaman da keçirə bilmir.
5. Dilini danışdığı və milli kimliyini daşıdığı ölkəsinə də gələ bilmir.
Bəlkə də bir çoxlarınız bunu oxuyub mənə yazığınız gələcək. Həyatımdan və verdiyim qərarlardan çox məmnunam. İndi oturun və bu siyasi hakimiyyətin sizin və övladlarınızın geyimindən tutmuş, uşaqlıq həyatına, təhsilinə və qidalanmasına qədər etdiyi təsiri və yaratdığı travmaları düşünün. Əgər Azərbaycanda heç zaman yaşamayan 10 yaşlı qızım bu qədər problemlərlə üzləşirsə, Azərbaycanda yaşayan və İlham Əliyevin birbaşa verdiyi qərarlardan asılı olan uşaqların taleyini bir düşünün. Siz bu təsiri həyatınızda 24 saat hiss edəcəksiz. Üzləşdiyiniz istənilən bir çətinliyin kökü siyasi hakimiyyətə dayanır.
Bəlkə də bir çoxlarınızın ağlına gəlməyən və siyasi rejimlə əlaqəsinin olduğunu düşünmədiyiniz bir misalı deyim. Bir çoxlarınız Azərbaycandakı bayağı tiktokerlərin son dərəcə populyarlıq qazanmasından gileylənirsiz. İstəməsəz də özünüzü o insanların səhifəsində tapırsız. Gənclik o tiktokerlərə böyük rəğbətlə yanaşır. Hər dəfə o tiktokerlərin iştirak etdiyi tədbirlərə axışan insanların sayı bunu deməyə əsas verir.
Dünyanın hər yerində bayağı olan tiktokerlər var. Amma bu tiktokerlərlə yanaşı, bayağı olmayanlar da var. Bu bayağı olmayan (elmi araşdırmalar, siyasi tənqid və s.) tiktokerləri izləyə bilən izləyiciləri yetişdirən təhsil sistemi də var. Bayağılıq etmədən də uğur hekayəsi yaza bilən tiktokerlər olduğu üçün düşük tiktokerlər heç kimi narahat etmir. Azərbaycanda isə alternativ olmur, ola bilmir. Rüşvətə bulaşmış və əlieyvləşmiş təhsil buna imkan vermir. Bu təhsil sistemindən çıxan çoxluq o bayağı tiktokerləri uğurlu insan kimi görməyə başlayır və onlara bənzəməyə çalışır.
Səviyyəli kontent yarada bilənlər üçün də Azərbaycan dilində kontent yaratmaq maraqlı olmur. Çünki o insanları izləyə biləcək insanların sayı çox məhdud olur. Beləcə də cəmiyyət uçuruma doğru yuvarlanıb gedir.
