Tofiq Yaqublu 3 gün sonra yenə aclığa başlayacaq.
Bundan əvvəlki həbsinə etiraz olaraq keçirdiyi aclıq aksiyası Tofiqin səhhətinə elə ciddi zərbələr vurdu ki, fəsadları hələ də qalmaqdadı.
3 gün sonra yenə aclığa başlayacaq və bu dəfə orqanizmi tab gətirməyə bilər…
“Mənə qarşı əsassız, qanunsuz və tərbiyəsiz 9 il azadlıqdan məhrumetmə hökmünə etiraz olaraq aprelin 1-dən aclıq aksiyasına başlayıram. Bilirəm ki, bu, çox çətin olacaq, eyni zamanda bir çox dostlar bu addımımı təqdir etmirlər. Bununla belə, mən bu addımı atmaqda qərarl
ıyam. İndi 65 yaşın içindəyəm. İlham Əliyevin planına görə mən həbsxanadan 74 yaşında çıxmalıyam. Ancaq mənim bu qədər yaşayacağıma heç bir zəmanət yoxdur. Xususilə də həbsxana şəraitində.
Digər tərəfdən, həbsxanada ölməsəm belə, ömrümün son illərini niyə həbsxanada keçirməliyəm? Mənə qarşı ləyaqətsizcəsinə, şərəfsizcəsinə şər atılıb və saxta ittihamla qanunsuz olaraq həbsdə saxlanılıram. Hər kəs bilir ki, mən siyasi fəaliyyətimə görə həbs olunmuşam.
İndi mən katapultu olmayan, təyyarəsi vurulmuş hərbi pilot vəziyyətindəyəm. Onsuz da təyyarə meşədə, çöldə və ya dağda düşəcək. Elə isə bunun sonu ölümdürsə, vurulmuş təyyarəni düşmənin hərbi bazasına çırpmaq daha doğru olmazmı? Həmin pilota 15-30 dəqiqə artıq yaşamaq nə verəcək ki? Ona görə də həbsxanada ölməyə qərar verdim.
Ümid edirəm ki, mənim həbsxanada ölümüm beynəlxalq aləmin diqqətini Azərbaycana fokuslamasına və cinayətkar Əliyev rejiminə daha ciddi təzyiqlər göstərməsinə səbəb ola bilər.
