Şəhid polkovnikin adı dərsliklərdən çıxarıldı – Nə baş verir?
Aprel döyüşlərində qəhrəmanlıqla şəhid olmuş Azərbaycan Silahlı Qüvvələrinin polkovniki Vüqar Yusifovun həyat yoldaşı Lalə Əliyeva onun adının tarix kitablarından çıxarılmasına etirazını bildirib.
Tacxeber.com xəbər verir ki, Lalə Əliyeva saytımıza müraciət edərək bildirib ki, 5-ci sinif tarix kitabı, Zəfər tarixi kitabında Aprel döyüşləri ilə bağlı hissədə Vüqar Yusifovun adı qeyd edilsə də, sonradan 5-ci sinif Azərbaycan tarixi dərsliyindən şəhidimizin adı çıxarılıb. O, bunun səbəbini anlamadığını deyib.
“Aprel döyüşlərində hamı bilməsə də, çox adam bilir ki, XTQ-nin (Xüsusi Təyinatlı Qüvvələr) ən yüksək rütbəli zabiti Vüqar Yusifov olub. Bu gün görürəm ki, onun adı tarix kitablarından çıxarılıb. Səbəb nədir, məqsəd nədir?! Mən rəsmi olaraq heç kimə müraciət etməmişəm, çünki müəllifləri tanımıram. Kitabların müəlliflərindən cavab istəyirəm, bunun səbəbini izah etsinlər” – deyə şəhidin xanımı bildirib.
Lalə Əliyeva əlavə edib ki, həyat yoldaşının adına məktəb verilməsə də, bununla bağlı heç bir narazılığı yoxdur. Lakin onun qəhrəmanlığının tarix kitablarından çıxarılmasını anlaya bilmir. O, Vüqar Yusifovun adının unudulmamasını və gələcək nəsillərə çatdırılmasını istəyir.
O, baş verənlərin ona ağır təsir etdiyini və məyus olduğunu bildirib:
“Bu, mənə çox təsir etdi, məyus oldum. Bir qızım Tibb Universitetinə bu il qəbul olub, digər qızım universitetdə təhsil alır, oğlum 5-ci sinifdə oxuyur. Bəs şəhidin övladları bunu görəndə deməyəcəklər ki, niyə bizim atamızın adını dərslikdən niyə silmisiniz?”
Lalə Əliyeva vurğulayıb ki, onun tək istəyi Vüqar Yusifovun adının dərsliklərə yenidən salınmasıdır. “Tək istəyim odur ki, adı dərsliklərə bərpa olunsun ki, övladları ataları ilə fəxr etsin, şəhidimizin adı unudulmasın,” – deyə o, qeyd edib.
Lalə Əliyeva bildirib ki, bütün tarix dərsliklərində Aprel döyüşlərinə dair məlumatlar yer alıb, lakin həmin döyüşlərdə ən yüksək rütbəli şəhid zabit olan polkovnik Vüqar Yusifovun adı qeyd edilməyib.
Vüqar Yusifov kimdir?
Vüqar Yusifov 1976-cı il noyabrın 2-də Şəmkir rayonunun Şiştəpə kəndində anadan olub. O, 1983-cü ildə Şiştəpə kənd orta məktəbinin birinci sinfinə gedib və 1993-cü ildə həmin məktəbi bitirib.
Elə həmin il Türkiyə Quru Qoşunları Ali Hərbi Məktəbinə daxil olub. 1997-ci ildə leytenant rütbəsi alıb və bir il sonra həmin ali məktəbi bitirib. Daha sonra Azərbaycan Silahlı Qüvvələrində xidmətə başlayıb və polkovnik rütbəsinə qədər yüksəlib.
2016-cı ilin Aprel döyüşləri zamanı qəhrəmancasına şəhid olub. Onun ailəsində 3 övladı yadigar qalıb.
Vüqar Yusifov qəhrəmanlığına görə ölümündən sonra Prezident İlham Əliyevin sərəncamı ilə “Vətənə xidmətə görə” ordeni ilə təltif edilib.
Hazırda onun adını daşıyan məktəb olmasa da, Şəmkir rayonunun Şiştəpə kəndində bir küçə şəhidin şərəfinə adlandırılıb.
