Litva və Latviya hakimiyyəti mayın 9-da Qələbənin 80 illiyini qeyd etmək üçün Rusiyaya uçmağı planlaşdıran Serbiya prezidenti Aleksandr Vuçiçin təyyarəsinin öz hava məkanından uçuşunu qadağan edib.

Bu barədə Serbiya mətbuatı məlumat yayıb. “Kurir”in yazdığına görə, Litva qadağanı “texniki və diplomatik şəraitlə” izah edib. Lakin Latviya hakimiyyəti imtina üçün əsas kimi uçuşun “məqsədinin siyasi həssaslığını” hesab edib.
Xatırladaq ki, aprelin 14-də Avropa diplomatiyasının rəhbəri Kaja Kallas Moskvada Qələbə Paradına səfərin həm Aİ üzvləri, həm də birliyə üzv olmaq üçün namizəd ölkələr üçün nəticələri olacağını bildirib. Sonuncuya, xüsusən də Serbiya daxildir.

Aleksandr Vuçiç Avropa İttifaqının siyasi təzyiqlərinə baxmayaraq, mayın 9-da keçiriləcək Qələbə Paradında Moskvaya getməkdən imtina etməyəcəyini bildirmişdi. Mayın 3-də məlum olub ki, Aleksandr Vuçiç Floridaya səfəri zamanı xəstələnib və bu səbəbdən ABŞ səfərini yarımçıq dayandıraraq Serbiyaya qayıtmalı olub. Belqradda o, yüksək qan təzyiqi ilə Hərbi Tibb Akademiyasına yerləşdirilsə də, elə həmin gün evə buraxılıb.

Tacxeber.com