“Jurnalistika cinayət deyil!” – Araz Əliyev
Ulviyya Ali hazırda ölkədə var olan bir çox media qurumundan daha böyük jurnalistdir. Onu “Amerikanın səsi”-də çalışdığı dövrdən tanıyıram. Ən son görüşümüz isə bir neçə gün öncə məhkəmə çıxışında oldu. Öz məhkəməsinə getmək əvəzinə “Toplum TV”-nin məhkəməsini izləmək üçün gəlmişdi. Bu axşam isə həbs olunduğu xəbərini aldım.
Ülviyyə çəkdiyi və işıqlandırdığı xəbərlərə görə, məhz jurnalist fəaliyyətinə görə həbs olunub. Təəssüflər olsun ki, artıq Azərbaycanda ən təhlükəli iş, ən təhlükəli peşə müstəqil jurnalist olmaqdır. Bu peşə elə Ülviyyə Əli kimi dostlarımızın sayəsində öz həqiqi mahiyyətini və məqsədini itirmir. Ülviyyənin son müraciətində də dediyi kimi:
“Azərbaycanı sükuta qərq etmək istəyən siyasi iradənin qarşısında bizim səsimiz hər zaman onların qulağındakı səssizliyi pozacaq. Bu, mənim azadlıqda yazdığım son yazı ola bilər. Amma inanıram ki, haqlı səs heç vaxt sükuta qərq ola bilməz.”
