Şəffaflıq kölgəsində liderlik: “Avromed”i böyüdən “Paşayev” izi
Azərbaycanın əczaçılıq sektorunda dominant şirkətlərdən biri olan “Avromed Company” Qapalı Səhmdar Cəmiyyəti son illərdə dövlət satınalmalarında ən çox önə çıxan şirkətlərdən biridir.
2025-ci il mayın 5-də TƏBİB-in tabeliyində fəaliyyət göstərən “İnnovasiya və Təchizat Mərkəzi” tərəfindən keçirilmiş tenderin qalibi olaraq şirkət yenidən gündəmə gəlib.
Sözügedən tender şəkərli diabet xəstəliyinin müalicəsində istifadə edilən dərman preparatlarının alınması ilə bağlı idi və müqavilənin dəyəri 51,2 milyon manatdan çox təşkil edir.
Şirkətin siyasi və biznes zəmində yüksəlişi
“Avromed Company” 2001-ci ildə hazırda parlamentdə deputat mandatı daşıyan Cavanşir Feyziyev tərəfindən həmtəsis edilib.
Şirkət yarandığı gündən etibarən ölkənin əczaçılıq bazarında milyonluq müqavilələr əldə etməklə, apteklərə, klinikalara və xəstəxanalara dərman vasitələri və tibbi ləvazimatların geniş çeşidini təqdim edir.
Rəsmi məlumata əsasən, “Avromed” 40-dan artıq ölkədən 200-dən çox beynəlxalq təminatçı ilə əməkdaşlıq edir və gündəlik 17 min adda məhsulu 2000-dən artıq aptekə çatdırmaq gücünə malikdir.
Bu logistik imkanlar şirkəti nəinki ölkədaxili bazarda unikal oyunçuya çevirib, eyni zamanda dövlət strukturları ilə bağladığı çoxsaylı yüksək məbləğli müqavilələr sayəsində strateji mövqe qazandırıb.
Səhmdarların kölgəsində gizlənən reallıq
Cavanşir Feyziyev 2016-cı ilə qədər şirkətin səhmdarı olub. O, deputat mandatı əldə etdikdən sonra payını təhvil verdiyini açıqlasa da, hazırkı səhmdarlarla bağlı ictimaiyyətə açıq informasiya yoxdur.
Azərbaycan qanunvericiliyinə görə, Qapalı Səhmdar Cəmiyyətlərinin səhmdarlarının adları ictimaiyyətə açıqlanmır – bu isə “Avromed” kimi strateji təchizatçıların mülkiyyət strukturunu qeyri-şəffaf edir.
Dövlət reyestrinə əsasən, şirkətin hazırkı hüquqi təmsilçisi Kamran İnqilab oğlu İskəndərovdur. Lakin Beynəlxalq Araşdırmaçı Jurnalistlər Konsorsiumunun (OCCRP) apardığı araşdırmalara görə, şirkətin kölgə səhmdarları arasında prezident İlham Əliyevin həyat yoldaşı Mehriban Əliyevanın əmisi oğlu Mir Cəlal Paşayev və Britaniyalı iş adamı, Mühafizəkarlar Partiyasının ianəçisi Cavad Marandi yer alıb.
Milyonluq müqavilələrlə gələn tender çempionluğu
2025-ci il may ayında baş tutan son tenderdə “Avromed”ə inyeksion şəkərsalıcı və oral hipoqlikemik dərman vasitələrinin alınması üçün 51,2 milyon manatdan çox ayrılıb. Bu, sadəcə bir ay öncə eyni qurumla imzalanmış 15,6 milyon manatdan çox müqaviləni tamamlayır və göstərir ki, “Avromed” dövlət satınalmalarında əsas oyunçulardan biri olaraq qalır.
Bu ardıcıl qələbələr, eyni zamanda şirkətin dövlət strukturları ilə uzunmüddətli və davamlı münasibətlərə malik olduğunu təsdiqləyir.
“Azerbaijani Laundromat”: Pul yuma şübhələri
Bütün bu uğurlar fonunda “Avromed” bir sıra maliyyə qalmaqallarının da mərkəzində olub. OCCRP-nin 2017-ci il hesabatına əsasən, şirkət “Azerbaijani Laundromat” adlı qlobal pul yuma sxemi ilə əlaqələndirilib və 2013–2014-cü illərdə 138 milyon ABŞ dolları dəyərində şübhəli vəsait qəbul etdiyi iddia olunub.
2021-ci ildə Böyük Britaniyanın Milli Cinayət Agentliyi (NCA) tərəfindən aparılan araşdırmada da şirkətin kölgə səhmdarları arasında Marandi və Paşayevin adı çəkilib, Marandinin şübhəli pul köçürmələrində iştirakı olan şirkətlərdən 230 milyon dollarlıq şübhəli vəsait aldığı bildirilib.
Marandi bu pul əməliyyatları ilə bağlı cinayətdə ittiham olunmayıb. Onun hüquq firması OCCRP-nin şərhlərinə cavab verərək qanun pozuntusunu rədd edib.
Cavanşir Feyziyev də bu iddiaları rədd edib və məhkəmədə özünü təmizə çıxardığını bəyan etsə də, “Avromed”in adı hələ də bir çox media orqanlarında bu iddialarla birgə hallanır.
Son söz əvəzi: Şəffaflıq axtarışında bir nəhəng
“Avromed Company”nin əczaçılıq sektorundakı güclü loqistik infrastrukturu, geniş məhsul çeşidləri və dövlət qurumları ilə sıx əməkdaşlığı, onu rəqiblərindən ayıran əsas xüsusiyyətlərdir. Lakin müəmmalı səhmdar strukturu, qalmaqallı keçmiş və ictimaiyyətə açıq olmayan mülkiyyət zənciri şirkətə yönələn sualları artırmağa davam edir.
Bir tərəfdən milyonluq müqavilələrlə yüksələn əczaçılıq imperiyası, digər tərəfdən isə cavabsız qalan şəffaflıqla əlaqədar suallar — “Avromed” bu iki reallığın kəsişməsində öz nəhəng biznes payını qorumağa çalışır. (MeydanTV)
Tacxeber.com