Hindistan-Pakistan toqquşmasının qalibi hələlik Çindir – Ərəstun Oruclu

Bir çox hərbi ekspertlərin və mərkəzlərin dəyərləndirməsi budur ki, 125 təyyarənin iştirak etdiyi 1 saatlıq hava döyüşündə Çin hərbi texnikası üstünlük nümayiş etdirib.

 

Pakistan tərəfin iddiasına görə Hindistan hərbi-hava qüvvələrinin 5 təyyarəsi vurulub və onların da 3-ü Fransa istehsalı olan Dassault Rafale təyyarəsidir. Fransız mənbələri vurulan təyyarənin cəmi 1, ABŞ mənbələri isə 2 olduğunu bildirirlər.

Rafale təyyarəsi hal-hazırda ən çox sifariş edilən qırıcılardan biri sayılır. Çox güman ki, indi sifarişlərin bir hissəsinə yenidən baxılacaq. Bu rəqəm təxminən 220 idi. Bir təyyarənin qiyməti modifikasiyasından asılı olaraq, $100-120 mln civarındadır.

Pakistan hərbi-hava qüvvələrinin döyüşdə istifadə etdiyi Çin istehsalı olan J-10C təyyarəsi isə təxminən 2-3 dəfə ucuzdur ($ 40-50 mln). Amma burada əsas üstünlük qazandıran təkcə təyyarələrin texniki parametrləri deyil.

Pakistan hərbi-hava qüvvələrinə üstünlüyü qazandıran həm də onların arsenalındakı raketlər olub. Belə ki, Rafale təyyarəsinin təhciz olunduğu “hava-hava” tipli raketlərin hədəfləri vurma məsafəsi 160 km, Çin istehsalı J-10C təyyarəsində isə 210 km-dir.

Bir çox mütəxəssislərin fikrincə əsas uğur qazandıran amil də bu olub. Başqa bir qrup ekspertlər isə təyyarələrin texniki parametrlərinin də bu məsələdə mühüm rol oynadığını vurğulayırlar.