Rusiyada məhv edilmiş təyyarələrin peyk görüntüləri yayılıb

Ukrayna dronlarının hücumundan sonra Rusiyanın İrkutsk vilayətində yerləşən “Belaya” aviabazasının ilk peyk görüntüləri internetdə yayılıb.

Tacxeber.com “UNİAN”a istinadla xəbər verir ki, peyk görüntüsünü OSINT analitiki Kris Biggers “X” sosial şəbəkəsində paylaşıb.

Şəkillər aviabazada ciddi dağıntılar olduğunu göstərir və Tu-95MS və Tu-22M3 tipli bombardmançı təyyarələrin vurulduğunu təsdiqləyir.

Şəkillərə əsasən, hücum nəticəsində ehtimal ki, 4 ədəd Tu-22M3, 3 ədəd Tu-95MS məhv edilib, daha bir Tu-95MS isə zədələnib.

“Əla planlaşdırılmış əməliyyatın möhtəşəm uğuru”, – deyə analitik görüntünü şərh edib.

Qeyd edək ki,  Ukrayna Təhlükəsizlik Xidməti Rusiyanın arxa cəbhəsində yerləşən bombardmançı təyyarələrin məhv edilməsi məqsədilə genişmiqyaslı xüsusi əməliyyat həyata keçirib. Ukrayna Təhlükəsizlik Xidmətinə məxsus dronlar hər gecə Ukrayna şəhərlərini bombalayan təyyarələri hədəfə alıb. Əməliyyat eyni vaxtda dörd hərbi aviabazada aparılıb. “Belaya”, “Dyagilevo”, “Olenya” və “İvanovo” aerodromlarında təyyarələr alova bürünüb.

Məlumata görə, ümumilikdə azı 41 təyyarə məhv edilib, Rusiyanın hərbi bombardıman təyyarələrinə 7 milyard dollardan çox ziyan dəyib

“Wall Street Journal” qeyd edir ki, onlarla uzaqmənzilli təyyarənin itirilməsi Rusiya üçün ciddi zərbədir, çünki bu təyyarələr Ukraynaya qarşı hücumlarda həyati əhəmiyyət daşıyır. Məsələ burasındadır ki, Rusiya Federasiyası artıq zədələnənlər arasında olan Tu-95MS və ya Tu-22M3 təyyarələrini istehsal etmir.

Tacxeber.com