Rusiya – Ukrayna cəbhəsində vacib hadisə baş verib.

BİLD nəşri yazır ki, Ukrayna gözlənilmədən hava döyüşündə qələbə qazanıb: Belə ki, hava döyüşü zamanı Ukraynaya məxsus F-16 qırıcısı təyyarəsi Rusiyanın Su-35 təyyarəsini məhv edib.

Ukrayna hava döyüşündə tarixi bir qələbə qazanıb: Qərb istehsalı F-16 qırıcı təyyarəsi ilk dəfə olaraq Rusiya istehsalı “Flanker” Su-35-i vura bilib. Döyüş dünən Ukraynanın şimal-şərqində baş verib. Sumı vilayətinin müdafiəsi çərçivəsində Ukrayna Hərbi Hava Qüvvələri Rusiyanın ölkə daxilində və qonşu Kursk vilayətindəki mövqelərinə aviazərbələr endirib.

Cavab olaraq, Rusiya Hərbi-Kosmik Qüvvələri havada üstünlük əldə etmək üçün yüksək texnologiyalı Su-35 qırıcı təyyarəsini döyüşə göndərib ki, Ukrayna təyyarələrini məhv etsin.

Lakin rus pilot pusquya düşdüyündən xəbərsiz olub: Belə ki,  ABŞ istehsalı olan F-16 ilə birlikdə havaya qalxan İsveçin Saab 340 AEW&C radar təyyarəsi Su-35-i sərhəddən 200 – 300 km məsafədə aşkar edərək koordinatları F-16-ya ötürüb.

ABŞ-ın F-16 qırıcısı AIM-120 raketini buraxıb və Su-35 Rusiya ərazisində, Kursk vilayətinin Korenevo şəhəri yaxınlığında, sərhəddən 16 km aralıda vurulub. Pilot katapult edərək xilas ola bilib. Ukrayna qırıcıları itkisiz şəkildə bazaya qayıda biliblər.