“Savaş yaratmaq istəyir, ailədən xəbəri olmayan ailədən danışır” – Xalq artistindən sərt sözlər

Müğənni Mehin Hümbətova açıqlamaları ilə diqqət çəkib. Sənətçi Azərbaycanda bəylərin həyat yoldaşları ilə birlikdə kluba gedə bilmədiklərini əsas gətirərək rahat istirahət etmədiklərini deyib.

“Bəylərimiz öz xanımları ilə istədikləri kimi istirahət edə bilmirlər. Rahat sevgi dolu həyat yaşaya bilmirlər ki, kənardan nə deyərlər? Qaynım, qardaşım görsə ki, xanımımla kluba gəlmişəm, nə deyərlər?”, – deyə düşünürlər. Get də. Əgər xanımınla kluba, restorana gedib, gözəl emosiyalar yaşamayacaqsansa, onu niyə almısan?”, – deyə sənətçi bildirib.

Bəs, həqiqətən bəylər həyat yoldaşları ilə rahat istirahət edə bilmir?

Mövzu ilə bağlı Ölkə.az-a danışan xalq artisti Nürəddin Mehdixanlı bildirib ki, Azərbaycanda son dövrlər dəb düşüb, ailədən xəbəri olmayanlar, ailənin nə olduğunu bilməyənlər ailə problemlərindən danışırlar: “Sevginin nə olduğunu anlamayanlar, sevgidən danışmağa başlayıb. Azərbaycanda süni surətdə ortalığa fikirlər atılır. Nəsillər arası guya savaş var, gənclərlə yaşlılar bir-birini qırır. Yoxdur axı belə şey. Mən də bu ölkədə yaşayıram. Bu savaşı görmürəmsə, televiziya ekranlarına çıxıb süni surətdə gündəm yaratmağa çalışanlar harada yaşayırlar? Onlar nə istəyirlər? Məqsədləri nədir? Azərbaycanda ailə institunu dağıtmaq istəyirlər, olmayan kişi-qadın savaşını körükləyirlər. Bu, kimə lazımdır? Nə üçün edirlər? Mənə elə gəlir ki, bir adam bir şeydən danışırsa, bunun haqqında danışmağa onun haqqı olmalıdır. Haqqı olmayanlar bu günləri meydan sulayırlar. Öyrənəndə, baxıb görürsən ki, kimdir, nə ilə məşğuldur? Ailəsi olmayan ailə prinsiplərindən danışır. Azərbaycan cəmiyyətinin problemlərindən, ağrılarından xəbəri olmayanlar yalançı, yad, sürünmüş ideologiyaları bizə sırımağa çalışırlar”.

Xalq artisinin sözlərinə görə, bu günləri Azərbaycan qadını ilə kişisi istədikləri yerə gedirlər, dünyanın istənilən ölkəsində istirahət edirlər:

“Kimin imkanı nəyə çatırsa, ailəsi, uşaqları ilə ora gedir. Bakıda restoranlara, istirahət mərkəzlərinə getsinlər, görsünlər, xanımı, uşaqları ilə dincələnlər var. Şəxsən mən yay vaxtı qızım, oğlum, nəvələrimlə yığışırıq gedib istirahət yerlərində otururuq. İstədiyimiz yerə gedirik və bizə kimsə nə mane olur, nə də bizim üçün bu, problemdir. Kökü, əsili olmayanlar, qarşılıqlı savaş yaratmaq fikrində olanlar haqqında da düşünmək lazımdır ki, bunlar kimdir? Bunlar bu ölkədən, bu millətdən nə istəyirlər, o bayraq onların gözünə niyə belə sərt girir? Bunların qarnının ağrısı nədir? Dünyanın hər yerində problem var. Kim bu günləri mənə gəlib sübut etməyə çalışar ki, Latın Amerikası ölkələrində hər şey gözəldir. O ölkələr də hər şey gözəldirmi ki, saat 8-dən sonra küçəyə çıxa bilməzsən, həyatın üçün təhlükə var. Bu günləri Azərbaycan ailələri daha dayanıqlıdır, daha xoşbəxtdir, ailə daxili münasibətlər daha sağlamdır. Nəinki yalandan həsrətini çəkdikləri, reklamını apardığı ölkələrdə. Ailə, sosial məsələlərlə bağlı danışanlar kimdir? Ora çıxanların fikir söyləməyə haqqı varmı? Bu sualların cavabını əvvəlcə özümüz üçün aydınlaşdırmalıyıq, ondan sonra onların dediklərinin doğru və ya yanlış olduqlarını ayırd etməliyik”.

Tacxeber.com