Naxçıvan reallıqları: Mustafayev qardaşlarının “qul bazarı” da varmış

Mustafayev qardaşlarından narazı olan bir qrup hərbi qulluqçu redaksiyamıza növbəti şikayət məktubu göndərib və anonimliyin qorunması şərtilə onu işıqlandırmağımızı xahiş edirlər.

Ovqat.com məlumatların ciddiliyini və dövləti maraqlarımız üçün əhəmiyyətini nəzərə alıb məktubu bəzi ixtisarlarla yayımlayır:

“Naxçıvan şəhər Su idarəsinin yanında yerləşən, ordunun balansında olmağına baxmayaraq Nemət Mustafayev şəxsi obyekti kimi tanınan “qul bazarı” var. Adına “Nemətin Bazası” da deyilir. Kərəm Mustafayevin qardaşı Nemət Mustafayevin hər gün səhər və axşam zabit, gizir, MAXE-ləri həmin ərazidə düzüb özünəməxsus tapşırıqlar verir, hər günün sonunda isə 705 nomrəli məktəbdə görülən işlərlə bağlı zabitlərlə iclas keçirir.

Həmin bazada gündəlik “normativlər” mövcuddur. Misal üçün, taxta, mismar, armatur, katanka, balbanka, zambaq və sairə. Sadalan adda olan “normativi” gün ərzində verə bilməyən gizir və MAXE-lər Nemət Mustafayev tərəfindər sərt şəkildə cəzalandırılır.

 Yeyintiləri güya leqallaşdırılmaq üçün N saylı Hərbi Hissə yaradılıb. Guya, bu hərbi hissə digər hərbi hissələrə təminat və kömək məqsədi daşıyır, amma əslində büdcədən ayrılan vəsaiti talamaq məqsədi ilə yaradılıb. Vasif Talıbov tərəfindən fəaliyyətinə son qoyulan Dizayn Holdinqdən müsadirə olunan texnika və avadanlıqlar bu hərbi hissəyə, yəni   Nemət Mustafayevə öz qanunsuz işlərində istifadə edib varidatını artırması üçün həvalə olunub. Həmin hərbi hissənin bəzi hərbi qulluqcuları mülki formada gündəlik işə gəlirlər, ancaq Nemət Mustafayevin  işlərini görürlər. Bu işlərdə işçi qüvvə olaraq əsgərlər fəhlə kimi işlədilir. Dövlətdən ayrılan fəhlə pulları isə yazılıb Nemət Mustafayev tərəfindən mənimsənilir. Nemət Mustafayev bazada qurduğu bu sistemlə Naxçıvan Muxtar Respublikasında  bütün söküntü işlərini ələ alıb və söküntülərdən gətirlən materiallar əsgərlər vasitəsi ilə təmizlənərək saf-çürük edilir. Sağlamları ayıraraq tikintilərdə yeni material adı ilə göndərilir. Bu inşaatlarda əsgərlər sözün həqiqi mənasında “qul” kimi  işlədilirlər. Tikintidə işləyən ustaları MAXE və gizir olaraq işə götürürlər. Onlar mülki formada işləyirlər və hərbi hissə üzü görmürlər dolayısıyla hərbi  xidmət etmirlər. Həm dövlətdən maaş, həm də gördükləri işin kvadratına, həcminə görə ödəniş alırlar. Əsl əziyyəti isə yanlarında işlətdikləri pulsuz “qul” əsgərlər çəkirlər. Bu inşaatlara parklar, bayraq meydanları, hərbi hissələr, bokslar, hangarlar və s. daxildir. Nəticədə köhnə materiallardan inşa olunan bu tikililər tez zamanda sıradan çıxır və müxtəlif problemlər  yaranır. Bu problemləri aradan qaldırmağa gəldikdə isə Nemət Mustafayev boynuna götürmür və “mən sizə sağlam iş təhvil vermişdim” deyir. Və bu minvalla problemlər ya daha da dərinləşir ya da təhvil alanlar təmir xərclərini öz ciblərindən ödəyərək təmir etməyə çalışırlar. İllik yekunda isə Forma 2-lərdə bütün materiallar avropa standartlarına uyqun göstərilir və dövlət büdcəsi bu şəkildə Nemət və Kərəm Mustafayevlər tərəfindən talanır.

Gələk cinayət faktına. Bazada xüsusilə iki nəfəri baş gizir Famil, təqaüdə göndərilən və təkrar orda mülki şəxs kimi işə götürülmüş Mürsəl haqqında cinayət faktını qeyd etmək istərdik. Familəlgərlik sexi, Mürsələ isə malyarxana həvalə olunub və bundan əlavə bu ikisi Nemətin “işverənləri”, söz aparıb söz gətirənləridir. Orada nə olursa, nə görürlərsə bazanın rəisi olan polkovnik leytenant Şanov Aslana məruzə edib, işləmək istəməyən əsgərləri qorxudub artıq hərbi xidmətə saxlatdırırlar, əsgərlərə qəddarcasına davranıb işlədirlər. Bu iki nəfər həm gördükləri işə görə maaş alırlar, həm dövlətdən maaş alırlar”.

Məktub müəllifləri Famil və Mürsəl adlı bu şəxslərin təzyiqləri nəticəsində bir əsgərin intihar etdiyi barədə şok iddialar da irəli sürüblər. İddialar araşdırıldığından hələlik təfsilatlara varmırıq. Yaxın günlərdə araşdırmamızın nəticələrini yayımlayacağıq.

Tacxeber.com