“TikTokda bir qızın 20 yanvar şəhidlərini çox pis formada təhqir etdiyini özündə əks etdirən bir görüntü rastıma çıxdı. O gün polisi söydülər. Bir neçə gün əvvəl “Şəhidlər xiyabanı”nı başqa bir şeyə bənzətdilər. Hamısı da eyni platformada-TikTokda. Fikrimcə, artıq yetər. Xalqımızın, millətimizin, cəmiyyətimizin məhz bu platforma vasitəsilə daha çox deqradasiyaya məruz qalmasına susmayaq”.

Tacxeber.com-ın xəbərinə görə, bunu ekspert Elçin Əfəndiyev bildirib.

O, TikTok platformasının ölkədə bağlanması üçün Nazirlər Kabinetinə, Daxili İşlər Nazirliyinə, Dövlət Təhlükəsizliyi Xidmətinə, Rəqəmsal İnkişaf və Nəqliyyat Nazirliyinə, Müdafiə Nazirliyinə və Baş Prokurorluğa çağırış edib: “Xahiş edirəm ki, ölkəmizdə TikTok sosial platformasının bağlanmasına razılıq verəsiniz. Məhz bu platforma vasitəsilə şəhidlərimiz haqqında təhqiramiz ifadlər səsləndirilir, hüquq-mühafizə orqanlarının, eləcə də digər qurumlar və ictimai şəxslərin ünvanına nalayiq ifadələr işlədir, cəmiyyətimizi mənəvi uçuruma aparan paylaşımlar yer alır”.

Tacxeber.com