“Şəxsən bizim kənddə – Bilgəhdə heç kim gedişhaqlarının qalxmasından narazılıq, şikayət etməyib. Bilmirəm, başqa kəndlərdə, Bakıda nə var, nə yox. Kimin dolanışığı pisdirsə, yaxşıdırsa, bu, ayrı söhbətdir. Yəqin ki, dövlət, hökumət belə məsləhət bilib, ona görə də gedişhaqlarını qaldırıblar. Açıq deyirəm, qiymət 10 qəpik qalxanda aləm qarışır bir-birinə. Bəs bu qədər yardımlardan da danışsınlar də. Hökumətdə çalışanlar bacardıqları qədər çalışıb-vuruşurlar ki, bahalaşma çox olmasın. Amma mümkün deyil axı. Hər şey dövlətdən, hökumətdən asılı deyil ki. Bazarda da bahalıq olanda camaat narazılıq edir. Bu gün 10 manata aldığın şey sabah gedib görürsən ki, 15 manatdır. Narazılıq olur, amma Hacı Qalib kimdir ki, dövlətin işinə qarışsın? Hökumətdə nə qədər adam işləyir, zəhmət çəkir. Sovetin vaxtında bu qədər basabas deyildi, indi problem çoxdur. Camaat tıxac əlindən nə edəcəyini bilmir…”

Bu sözləri Pravda.az-a açıqlamasında sabiq deputat, Qafqaz Müsəlmanları İdarəsinin sədri Allahşükür Paşazadənin qudası Qalib Salahzadə deyib.

O, “sonuncu dəfə ictimai nəqliyyatdan nə vaxt istifadə etmisiniz?” sualına isə belə cavab verib: “Vallah, yalan deyə bilmərəm ki, avtobusa nə vaxt minmişəm. Heç yadıma gəlmir. Maşın olan yerdə metroya niyə minim? 18 yaşımda maşınım olub. O vaxt “Qaz 24” deyirdilər, maşınım ondan idi. Buna baxmayaraq, həmişə kasıb-kusubun, camaatın içindəyəm. Sovet hökumətinin vaxtında benzinin litrini 20 qəpiyə alırdım. Əvvəl 10 qəpik idi. Bircə onu bilirəm, atam “QAZ 24”ü əlimdən aldı ki, sən uşaqsan, olmaz. “01 Jiquli” çıxmışdı, atamdan xəbərsiz iki gündən sonra onu dostumun adına aldım. Bir həftədən sonra rəhmətlik atam dedi ki, sənin dostunun maşını hardandır? Dedim ki, özü alıb. Bir-iki ay dostum maşını həyətində saxladı, “şofer” kimi arxamca gəlirdi. Sonra atam başa düşdü. Dedi ki, müəllim adamam, bilmirəm ki, o uşaq maşını necə alıb? Əvvəllər belə problemlər var idi…”

Tacxeber.com