Əli Həsənovun oğlu pulları qumarda uduzdu

ABŞ-də daşınmaz əmlak şirkətlərində işə başlayan Şamxal Həsənli özünün “SOLIS DEVELOPMENT LLC” adlı şirkətini qurub.

Bu barədə məlumat verən demokrat.az saytı yazır ki, Mayamidə belə bir şirkət qurmaq üçün on milyonlarla vəsait lazımdır ki, Şamxal Həsənlidə olan bəlkə də yeganə şey mediadan oğurladıqları milyonlardır.

“Şirkət quran Şamxal Kolumbiya Universitetinin daşınmaz əmlak ixtisasına da qəbul olundu. Bu, ABŞ-nin ən pullu universitetlərindədir və hər adam orada təhsil ala bilməz, məsələ savadlı olmaqda yox, təhsilin ödənişidir. Şamxal buna da nail oldu və universiteti yenicə bitirib, ABŞ-nin iş dünyasına atılıb.

Özünü mükafatlandırmaq üçün də Havay adalarında istirahət edir, bu azmış kimi milyonlarla dollar dəyərində olan əmlak alıb”, – deyə sayt yazıb.

Bildirilib ki, Prezident Administrasiyasının ləğv olunmuş İctimai-siyasi məsələlər şöbəsinin sabiq müdiri Əli Həsənovun oğlu gününü dünyanın qumar və əyləncə mərkəzi olan Las-Veqasda keçirir. Las-Veqas gecələrinə qatılan Şamxal Həsənli bu yaxınlarda “Golden Nugget Las Vegas Hotel & Casino” adlı hoteldə qumar oynayaraq, nə az, nə çox, düz 140 min dollar pul uduzub: “Bu pulu o, atasına məxsus “Mercedes GL” markalı avtomobilin satışından əldə edibmiş. Belə ki, ABŞ-a köçməmişdən öncə özü ilə daha çox vəsait aparmaq üçün Bakıda Əli Həsənovun “Mercedes”ini satıb, okeanın o tayına çatan kimi da Las-Veqas kazinosunda qumara qoyub. Hətta, buna görə Əli Həsənov oğluna bərk əsəbiləşib, dalaşıblar”.

Sayt yazır ki, həmin 140 min nə Əli Həsənovun, nə də onun avtomobilinin pulu yox, dövlət büdcəsindən mediaya ayrılan vəsait hesab oluna bilər.

“Çünki Əli Həsənov bütün sərvətini məhz mediaya ayrılan pulları oğurlamaq hesabına əldə edib. Oğlu da Azərbaycan mediasının pulunu qumarda uduzub.

140 min dollar media üçün böyük puldu, Həsənovlar üçün isə yox. Mediamız uzun illər Əli Həsənov zülmündən əziyyət çəkdi, dövlətin bizə ayrılan pulları mənimsənildi. İndi Şamxal Həsənli də məhz bizim pullarımızla Mayamidə, Las-Veqasda kef çəkir”, – mətbu orqanı yazıb.

Tacxeber.com