“Neftçi”yə keçməyimdə Bakını sevən sevgilimin rolu olub” – Filip Ozobiç

“Dörd dəfə Azərbaycan çempionluğunu qazandığım “Qarabağ”la əvvəlki müqaviləm başa çatmışdı və bir sıra suallarım var idi. Bununla belə, “Neftçi” konkret idi və mənə “Qarabağ”dakı şərtlərə çox oxşar olan əla təklif etdi. Gözləmək istəmədiyim üçün dərhal imza atdım.  Bu qərarda Bakını sevən sevgilimin də rolu olub. O, bu şəhərdə qalmaq istəyirdi”.

Bu sözləri “Neftçi”nin yeni transferi Filip Ozobiç sportske.jutarnji.hr saytına müsahibəsində deyib.

“Bəzən qadının dediyinə qulaq asmaq lazımdır (gülür). 2016-cı ildə Azərbaycana “Qəbələ”yə gələndə düşündüm: “10 il burada qalacağam”. Gördüm ki, bura futbolçu üçün yaxşı ölkədir.  Daha sonra ölkənin ən güclü klubu olan “Qarabağ”dan dəvət aldım. İllər sürətlə keçir. “Neftçi” ilə 2 illik müqaviləmi də nəzərə alsaq, Azərbaycanda 9 il olacağam” – deyə o bildirib.

Xorvatiyalı futbolçu ölkəmizdə xoşbəxt olduğunu söyləyib: “Burada gözəl xatirələrim var. Biz çoxlu avrokubok oyunlarına çıxmışıq. Və 5 ildən sonra Azərbaycan millisinin futbolçusu oldum. Bu yaxınlarda Avro-2024-ün seçmə mərhələsində Estoniya ilə matç üçün millidə idim. Başa düşdüm ki, Azərbaycan Premyer Liqasından Xorvatiya millisinə heyətində yer ala bilməyəcəm. Bu, daha yüksək səviyyədir. Üstəlik, mənim mövqeyimdə çoxlu rəqabət var. Mən bunu qəbul etdim və Azərbaycanda oynamağa razılaşdım. Ümid edirəm ki, bu tsikldə əvvəlkindən daha uğurlu olacağıq. Baxmayaraq ki, İsveç  və Avstriyaya uduzub, Estoniya ilə heç-heçə etmişik”.

O, “Neftçi”yə keçməzdən əvvəl Xorvatiyadan təkliflərinin olub-olmadığı ilə bağlı deyib: “Müzakirələr oldu. Amma konkret təklif olmadığına görə gecikdirmək istəmədim. “Neftçi”nin yaxşı idarəçiliyi var. “Qəbələ”də yanımda olan idman direktoru Zaur Əzizov da bu qərarıma təsir etdi. Eyni evdə qalıram, eyni şəhərdə oynayacağam, heç nə dəyişməyib. “Qarabağ”da inkişaf etdim, amma indi böyük öhdəliklərim var. Çünki “Neftçi”də məndən çox şey gözləyirlər. Karyeramı Azərbaycanda bitirib-bitirməyəcəyimi deyə bilmərəm, amma bu, istisna deyil”.

Qeyd edək ki, “Qarabağ”la müqaviləsi bu yay başa çatan Ozobiç “Neftçi” ilə 2 illik müqavilə imzalayıb. (Qol.az)

Tacxeber.com