Şolts və heyəti təyyarədən çıxıb yerə uzanmalı oldular – VİDEO

Almaniya kansleri Olaf Şolts və onun nümayəndə heyəti Təl-Əvivdə (İsrail) hava hücumu xəbərdarlığı səbəbindən təyyarədən çıxarılıblar.

Buna dair sosial şəbəkələrdə video yayılıb.

Görüntülərdə Almaniya kansleri heyətin qalan sərnişinləri ilə birlikdə təyyarədən çıxarılır. Daha sonra onlar təyyarənin yanında yerə uzanmalı olurlar. Videonu çəkən şəxs kameranı göyə yönəldib. Səmada iki naməlum uçan obyekt görüntülənib.

Xatırladaq ki, Olaf Şolts Baş nazir Benyamin Netanyahu ilə İsrail-Fələstin münaqişəsinin eskalasiyasını müzakirə etmək üçün oktyabrın 17-də İsrailə həmrəylik səfəri edib. O, Almaniyanın İsraili qeyd-şərtsiz dəstəklədiyini və ölkənin radikal Fələstin hərəkatı HƏMAS ilə mübarizədə Berlinə arxalana biləcəyini açıqlayıb.