Günəş fırtınası gözlənilir: hansı fəlakətlər olacaq?

Günəş fırtınaları təkcə rabitə sistemləri və peyklərə deyil, həm də qatarların hərəkəti üçün təhlükə yarada, qəza riskini artıra bilər.

Bu barədə Lankaster Universitetinin alimləri məlumat yayıblar.

“Güclü Günəş emissiyaları dəmir yollarında elektron siqnal stansiyalarına müdaxilə edərək maqnit fırtınalarına səbəb ola bilər. Bu müdaxilə, hətta dəmir yolunun “Dayan” və “Hərəkət et” nişanlarını dəyişə bilər. Siqnalın, məsələn, yaşıldan qırmızıya dəyişdirilməsi yalnız hərəkət edən qatarın dayanmasına gətirib çıxaracaqsa, əks vəziyyətdə ciddi fəlakətə səbəb ola bilər”, – məlumatda deyilir.

Alimlər bildiriblər ki, 11 illik Günəş aktivliyi dövrünün ən pik vaxtında dəmir yolu sistemləri və digər infrastruktur üçün risklər xüsusilə yüksək ola bilər.

Qeyd edək ki, ABŞ Milli Okean və Atmosfer Administrasiyasının məlumatına görə, cari 11 illik dövrdə Günəşin ən pik həddə çatması 2024-cü ilin yanvar və oktyabr ayları arasında gözlənilir. (Axar)

Tacxeber.com