Azərbaycan xalqının təfəkkür, düşüncə kodları var və cəmiyyət, toplum bu kodlarla idarə olunur.
Bu kodlarla bağlı öz çıxışlarımda xeyli danışmışam, bu barədə bir çox yazılarım da var.
Məsələn, xalqımızın seksual aclığı var, bu aclıq bir koddur. Ona görə də intim videolarla ayrı-ayrı şəxsləri vurmaq, hətta bütöv bir dövlət qurumunu nüfuzdan salmaq mümkündür.
Son FHN gündəmi buna bariz nümunədir. Hamımız lağlağı elədik, məsxərəyə qoyduq, söydük, ha, ha, hi, hi… Enerjimiz xeyli boşaldı. Düzü, bu mövzuda ciddi nəsə yaza biləcək ağıllı adamlarımız da var. Ancaq təəssüf ki, toplumda bunu qəbul və həzm edəcək potensial yoxdur deyə bəzən elə o ağıllı adamların özü ha, ha, hi, hi-yə qoşulub gedir. Kütləvi nadanlıq adamı boru kimi özünə çəkir.
Fikir verin, hal-hazırda ölkədə güclü meşə yanğınları baş verir. FHN öz nüfuzunu bərpa eləmək üçün əsl fürsətdir. Çünki xalqımızın seksual aclığı olduğu kimi qəhrəmanlıq, fədakarlıq aclığı da var və bunlar da bir koddur. FHN əməkdaşlarını töksün meşələrə, aralarında qadın əməkdaşlar da olsun. Biri uşağı qucaqlayıb qaçsın, biri pişiyi yanğından xilas eləsin və pişiyin başını sığalladığı yerdə şəkillər, videolar çəkilsin. Videolara damara işləyən fars musiqilərindən də əlavə eləyib bassınlar sosial şəbəkələrə. Bunlar yalandan yox, həqiqət də ola bilər. Amma videolarda fars musiqiləri mütləq olmalıdır. Təsir effektini birə yüz artırır.
Heç vaxt istəmərəm ki, oyunların içində kimsə dünyasını dəyişsin, ancaq nə yazıq ki, biz oyun qurbanlarını çox görmüşük. Bir neçə FHN əməkdaşı tüstüdən boğulub vəfat etsə (Allah uzaq eləsin), vəssalam, kimin nə duxu var FHN haqqında artıq-əskik nəsə yazsın, o adamı millət özü cırıq-cırıq edər.
Çox uzun yazmaq olar.
Ölkənin idarə edilməsi metodunu, xalqın kodlarını, avam və cahil insanlarla oyun üsullarını biləndən və başa düşəndən, anlayandan sonra düzü, adamın nəsə yazmağa həvəsi də qalmır. Həm də yazacaqsan, başa düşülməyəcəksən, millətlə əng-əngə verməyə halım da yoxdur. Hökumət də əvvəlki kimi deyil, xeyli ağıllanıb. Daha hər kəsi tutmur, adamın torbasını tikib millətin qabağına elə atır ki, səni öz sevdiklərin və sevənlərin daş-qalaq eləyir. Axırda özün qaçıb hökumətə yalvarırsan ki, qurban olum, məni bunların əlindən xilas elə.
Hərdən adam özünə bir qəbir qazıb girib içində yaşamaq istəyir. Arada da başını qəbirdən çölə çıxrıb tez də aşağı əyiləsən ki, heç kim görməsin.
Ya da Ramiz Rövşən olasan.
Oğlu-qızı yerbəyər eləyəsən, ev-eşik, bağ-bağat, gün-gözəran, xalq sevgisi, hakimiyyət rəğbəti, arada da çıxıb verilişdə-zadda deyəsən ki, təpədən dırnağa hirs içindəyəm.
Kəramət Böyükçöl
