Şimali Koreyadan gələn mərmilər Rusiya top və minaatanlarının lülələrində partlayır…-RƏSMİ

Rusların öz istehsalı olan sursatları yoxdur, ona görə də Ukraynaya qarşı Şimali Koreyadan alınan aşağı keyfiyyətli artilleriya və minaatanlardan istifadə edirlər.

 “NV” kanalı xəbər verir ki, bu barədə çərşənbə günü, dekabrın 20-də Ukrayna Silahlı Qüvvələrinin Baş Qərargahı məlumat yayıb.

“Belə sursatların qeyri-qənaətbəxş vəziyyətinə görə onların bilavasitə işğalçıların top və minaatanlarının lülələrində partlaması ilə bağlı ayrı-ayrı hallar qeydə alınır ki, bu da işğalçıların silah və şəxsi heyətinin itkisinə səbəb olur”, – deyə hərbçilər bildirib.

Xüsusilə, bu cür hallar general-polkovnik Mixail Teplinskinin komandanlıq etdiyi Rusiya qoşunlarının Dnepr qrupunda qeydə alınır.

Xatırladılır ki, sentyabr ayında Şimali Koreya diktatoru Kim Çen In Rusiya Federasiyasına səfər edib, Vladimir Putinlə görüşüb və Rusiyanın Ukraynaya qarşı müharibəsini “müqəddəs mübarizə” adlandırıb.

Növbəti ay Ağ Ev bildirib ki, Şimali Koreya son həftələrdə Rusiyaya 1000 konteynerə qədər avadanlıq və sursat daşıyıb. Eyni zamanda “The Washington Post” son iki ay ərzində Rusiya gəmilərinin dəfələrlə Şimali Koreyadan yük götürərək Rusiyanın hərbi limanına çatdırdığını göstərən peyk görüntülərini dərc edib.

“The Economist” yazır ki, Pxenyan Moskvaya artilleriya mərmiləri və “Katyuşa” tipli raketlər ötürür.

Baş Kəşfiyyat İdarəsinin rəisi Kirill Budanov bildirib ki, Rusiya Federasiyası Şimali Koreyadan 122 mm və 152 mm-lik mərmilər, həmçinin “Qrad” raketləri alır. (Moderator)

Tacxeber.com