AŞPA deputatları Azərbaycan nümayəndə heyyətinin səlahiyyətlərinin məhdudlaşdırılmasına çağırıb.
Avropa Şurası Parlament Assambleyasının (AŞPA) 2024-cü ilin qış plenar sessiyasının açılış günündə deputatlar “təşkilatın prinsiplərini pozduğuna görə” Azərbaycanın nümayəndə heyətinin səlahiyyətlərinin məhdudlaşdırılmasına səs veriblər.
Parlament Assambleyasının Almaniyadan olan millət vəkili Frank Şvabe bu təklifə əsas səbəb kimi Azərbaycanda siyasi məhbusların sayının artmasını, insanların Qarabağdan məcburi köçürülməsini, Assambleya məruzəçilərinin 2023-cü il ərzində ən azı üç dəfə Azərbaycana gələ bilməməsini və fevralın 7-də ölkədə keçiriləcək prezident seçkilərini müşahidə etmək üçün dəvət edilməmələrini göstərib.
Təklif səsverməyə çıxarılıb və səs çoxluğu ilə qəbul edilib.
Onu qaydaların tələb etdiyi kimi ən azı beş milli nümayəndə heyətindən ibarət Assambleyanın otuza yaxın üzvü dəstəkləyib.
İclasa sədrlik edən Emmanuelis Sinqeris deyib ki, təklif dərhal hesabat üçün Assambleyanın Monitorinq Komitəsinə və rəy almaq üçün Nizamnamə Komitəsinə göndərilib. Komitənin öz rəyini təqdim etmək üçün 24 saat vaxtı var.
Bildirilib ki, çərşənbə günü, yanvarın 24-ü axşam Assambleyada müzakirə ediləcək.
Nizamnaməyə əsasən, Assambleya üç variantdan birinə səs verməlidir: səlahiyyətləri ratifikasiya etmək, onları ratifikasiya etməmək və ya “Assambleyanın və onun orqanlarının fəaliyyətində müvafiq nümayəndə heyətinin üzvlərinin müəyyən iştirak və ya təmsilçilik hüquqlarından məhrum edilməsi və ya həyata keçirilməsinin dayandırılması ilə birlikdə” ratifikasiyası.
Qeyd edilir ki, Azərbaycan nümayəndə heyətinin üzvləri Assambleya qərar qəbul edənə qədər müvəqqəti olaraq digər Məclis üzvləri ilə eyni hüquqlara malikdirlər, lakin onların etimadnamələrinin yoxlanılması ilə bağlı hər hansı prosesdə səs verə bilməzlər.
