“NATO Ukrayna qarşısında çox günahkardır” – Boris Conson

“NATO-nun fəaliyyətsizliyi Rusiyanın Ukraynaya tammiqyaslı hərbi müdaxiləsinə səbəb olub…”

“Dünyada elə vəziyyət yaranıb ki, demokratiya geri çəkilir, avtokratiya isə öz istəyinə nail olur…”

NATO “iki stulda əyləşməyə” cəhd edib, bu da Putinə Ukraynaya hücum etmək üçün “yaşıl işıq” yandırıb.

Tacxeber.com xəbər verir ki, bu barədə Böyük Britaniyanın sabiq baş naziri Boris Conson BBC-nin “Putin Qərbə qarşı” miniserialında bəyan edib. Məlumatı “zn.ua” nəşri yayıb.

Conson qeyd edib ki, NATO Ukrayna qarşısında çox günahkardır, çünki Alyansın fəaliyyətsizliyi ucbatından Rusiyanın Ukraynaya tammiqyaslı hərbi müdaxiləsi mümkün olub.

“NATO-da dərin institusional günah hissi mövcuddur. Əgər Alyans vəd etdiklərini icra etsəydi, ukraynalılar həqiqətən Alyansın tamhüquqlu üzvlüyünə aparan yolda olsaydı, böyük ehtimalla, Rusiya prezidenti Vladimir Putin etdiklərini edə bilməyəcəkdi”, – Conson qeyd edib.

Onun sözlərinə görə, NATO neytral mövqe sərgiləməyə cəhd edib, bu da nəticə etibarilə fəlakətli nəticələrə gətirib çıxarıb.

“Uzun müddət bizim kollektiv birmənalı mövqeyimiz, eyni zamanda, hər zaman iki stulda oturmağa cəhdlərimiz iflasa uğrayıb və Putin qərar verib: “Aha, onlar ciddi deyil”, – Conson vurğulayıb.

Onun sözlərinə görə, hazırda dünyada elə vəziyyət yaranıb ki, demokratiya geri çəkilir, avtokratiya isə öz istəyinə nail olur.