“Beşiktaş” Qurban Qurbanovla maraqlanır – KİV
Türkiyə Superliqasının nəhənglərindən “Beşiktaş”da ardıcıl pis nəticələrdən sonra Fernando Santosun mövqeyi sarsılır.
Bunu ölkədə fəaliyyət göstərən “Fotospor” idman nəşri yazıb.
Bildirilir ki, klubun baş məşqçiliyinə əsas namizəd isə Azərbaycan təmsilçisi “Qarabağ”ın çalışdırıcısı Qurban Qurbanovdur.
İddiaya görə, “Beşiktaş”ın Futbol Direktoru Səməd Aybaba həftə ərzində Almaniyaya gedib. O, əvvəlcə “Dortmund”-PSV, sonra isə “Leverkuzen”-“Qarabağ” matçlarını izləyib.
Bildirilir ki, Aybaba “Qarabağ”ın bu mövsüm Bundesliqanı “alt-üst edən” “Leverkuzen”lə oyununa heyran qalıb. Onu heyran edən “Köhlən atlar”ın məşqçisi Qurban Qurbanovun oynatdığı sadə və dəqiq futbol olub.
Hələ ki, klublar və ya Qurban Qurbanovun özü məsələyə münasibət bildirməyib.
