“Nigar Camal üzünü bir milyon dəyərində sığortalayıb, futbolçular da ayaqlarını sığorta etdirmək istəyir” – MARAQLI + FOTO
“Bədən üzvlərinin sığortası könüll sığorta növünə aiddir. Sığorta şirkətləri də fərdi yanaşa bilərlər. Buna dünya praktikasından bir çox misallar da gətirə bilərik. Hansı ki, məşhur ulduzlar daha çox bu sığorta növünə müraciət edir. Bu adətən reklam xarakterli olur. Müəyyən qədər daha yüksək məbləğ təminat verməklə hər hansı bədən üzvünü sığorta etdirmək mümkündür. Sığortanın təyinatı daha çox təminat əldə etməkdir. Həm təminat vermiş olur, həm də fərdi və fərqli yanaşaraq reklam xarakterli də bir addım atılmış olur”.
Tacxeber.com xəbər verir ki, bunu Moderator.az-a açıqlamasında Azərbaycan Sığortaçılar Assosiasiyasının ekspert qrupunun üzvü Emil Ağabağırov deyib. O daha sonra əlavə edib.
“Tanınmış və sevilən müğənnimiz Nigar Camal o vaxt üzünü sığortalamışdı. O vaxt mətbuata açıqlanmışdı ki, sığortalanma 1 milyon dəyərində idi. Əlbəttə ki, Allah etməsin, hər-hansısa problem yaranarsa onun tibbi xərclərini sığorta şirkəti qarşılayacaq. Burada da müəyyən bir razılığa gəlib sığorta təminatı vermək mümkündür. Mən təcrübəmdən deyim ki, futbolçulardan müraciətlər çox olub. Onların işi elədir ki, ayaqları tez-tez zədələnir. Müraciətlərin çoxu da ayaqlarını sığorta etdirməklə bağlı olub. Əslində sığorta şirkətləri bu cür risklərin qarşılığında nisbətən yuxarı sığorta haqqı təklif edə bilərlər. Təbii ki, sığorta şirkətləri bundan imtina da edə bilər. Bu artıq asılıdır onların yanaşmasından. Belə deyək də, könüllü sığorta növündə şirkətlər köhnə avtomobillərin kasko sığortasını etmir. Bilirlər ki, riskləri var. Eynilə də daha yaşlı insanlar ola bilər ki, müraciət etsinlər, cavab olaraq müraciət imtina olunsun. Çünki bu gün könüllü tibbi sığortanı fərdi şəkildə əldə etmək mümkün deyil. Hər-hansısa vətəndaşın səhhətində narahatlıq varsa, daha çox onlar gedib bu könüllü sığorta növünü əldə edəcəklər. Bu da sığorta şirkətləri üçün yalnız zərərli baza kimi formalaşmış olacaq. Onsuz da könüllü tibbi sığorta bu sektor üçün ən az mənfəət gətirən məhsullardandır.
