ABŞ Prezidenti Co Bayden ABŞ-nin cənub sərhədini, yəni Meksika ilə sərhədi qanunsuz keçən miqrantlara sığınacaq verilməsini müvəqqəti olaraq qadağan edib.
Tacxeber.com xəbər verir ki, Ağ Evin saytında dərc olunan bəyanata görə, görülən tədbirlər ABŞ-də olmaq üçün heç bir hüquqi səbəbi olmayan şəxslərin ölkədən çıxarılmasını asanlaşdıracaq.
Bayden administrasiyası dərhal qüvvəyə minən qadağanın daimi olmayacağını bildirib:
“Qadağa indi olduğu kimi cənub sərhəd həddindən artıq yüklənəndə qüvvəyə düşəcək. Sərhədi keçən miqrantların sayı ABŞ rəsmilərinin immiqrasiya əməliyyatlarını effektiv şəkildə idarə etməsi üçün kifayət qədər az olarsa, tədbirlər ləğv ediləcək”.
“Reuters”in adının açıqlanmasını istəməyən amerikalı məmura istinadən verdiyi məlumata görə, tədbirlər həftə ərzində sərhəddə hər gün orta hesabla 2500-dən çox saxlanılma həyata keçirildiyi təqdirdə tətbiq ediləcək və say gündə 1500-dən aşağı düşdüyü zaman qaldırılacaq. Mənbənin sözlərinə görə, görülən tədbirlər cənub sərhədini qanunsuz keçənlərin sayını xeyli azaldacaq.
Qurum rəsmisi qeyd edib ki, məhdudiyyətlər valideynlərin və ya qəyyumların müşayiəti olmadan sərhədi keçən uşaqlara, habelə insan alveri qurbanlarına və tibbi baxımdan ciddi təhlükə altında olanlara şamil edilmir.
