İyunun 6-da Zərdab rayonunda qadın doğuş zamanı həyatını itirib. 

Tacxeber.com xəbər verir ki, ikinci dəfə ana olmaq üçün Zərdab Rayon Mərkəzi xəstəxanasına çatdırılan Ülviyyə Teymur qızı Nəzərli doğuşdan bir neçə saat sonra vəfat edib.

Onun dünyaya gətirdiyi oğlu isə sağ qalıb. Mərhumun yaxınları iddia ediblər ki, onun ölümündə həkimlər günahkardır.

Anası Sevinc Nağıyeva qızının hamiləlik dövrünün normal keçdiyini, paytaxtdakı həkimlərdən birinin nəzarəti altında olduğunu bildirib.

Onun sözlərinə görə, qızı hər ay mütəmadi analizlər verib və müayinələrdən keçib. Həkimin təyin etdiyi vaxtda isə xəstəxanaya gətirilib:

“Qızım əməliyyat olunandan sonra yoldaşına deyib ki, qarnımın içindən nəsə axır. Həkim isə bunun normal olduğunu bildirmişdi. 15 dəqiqə keçəndən sonra isə qızım koma vəziyyətinə düşdü”.

Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) bildirilib ki, 1996-ci il təvəllüdlü Ülviyyə Nəzərli iyunun 6-sı saat 12:00-da Zərdab Rayon Mərkəzi Xəstəxanasının Doğum şöbəsinə daxil olub:

“Xəstə saat 12:00-da uşaqlıqda çapıq diaqnozu ilə mərkəzə daxil olub. Saat 14:00-da qeysəriyyə əməliyyatı icra edilib. Ana və uşağın səhhəti normal və qənaətbəxş hesab edilib. Saat 18:00-dan sonra xəstədə qıcolma, psixomotor oyanıqlıq müşahidə olunub və huşu pisləşib. Xəstə dərhal Reanimasiya şöbəsinə yerləşdirilib, lakin aparılan tibbi tədbirlərə baxmayaraq onu xilas etmək mümkün olmayıb”.

Qeyd edək ki, bu, ananın ikinci övladı olub.

Hadisə ilə bağlı Zərdab Rayon Prokurorluğunda araşdırma aparılır.