Dini kəbin rəsmi nikahdan bahadır? – SORĞU
Azərbaycanda ailə quranların əksəriyyəti rəsmi dövlət nikahı ilə yanaşı dini kəbin də kəsdirirlər.
Dini nikahı məscid axundları və mollalar icra edirlər.
Cəmiyyətdə nikahın həm dövlət, həm də din adamları tərəfindən təsdiq edilməsi özü də birmənalı qarşılanmır. Çünki nikah dövlət tərəfindən şahidlər olmaqla təsdiq edilir və evliliyin rəsmiləşdirilməsinə xidmət edir. Cütlüklər 10 manat dövlət rüsumu ödəməklə nikaha daxil ola bilir.
Dində isə nikahın kəsilməsinin savab, pulsuz olduğu deyilsə də, bu iş havayı başa gəlmir. Rəsmi olmadığı və konkret məbləğ müəyyən olunmadığı üçün gənclərdən fərqli məbləğ tələb olunur.
Paytaxtdakı məscidlərin bir neçəsində nikahın neçəyə başa gəldiyi araşdırılıb.
El arasında Göy məscid kimi tanınan Əjdərbəy məscidində kəbinin qiyməti 20 manatdan başlayır. Məsciddən saytımıza bildiriblər ki, kimin imkanı nəyə çatırsa, onu da verir:
“Yoxdu heç verməsinlər, şirni (şirinlik) verirlər, 20,30, 50 manat olur. Kim nə verir, verir. Kəbinə qiymət qoysaq, günah olar. Sadəcə, şirni kimi verirlər. İmkanlı adam gəlir 100 manat verir”.
Cümə məscidində isə minimum qiymət 30 manatdır. Həmin məsciddə də kəbin üçün 30, 40, 50 manat ödənildiyini deyiblər.
Təzəpir məscidindən isə qiymətin kəbin kəsildiyi zaman bəlli olduğu bildirilib.
