Ana südünə ən yaxın məhsul eşşək südü imiş
Eşşək südü qədim dövrlərdən bəri həm qida, həm də müalicəvi məqsədlərlə istifadə edilən qiymətli məhsuldur. O, xüsusilə, Avropa və Asiyada ənənəvi tibbdə çox yüksək dəyərləndirilib.
Tacxeber.com xəbər verir ki, eşşək südünün unikal tərkibi və faydaları bu məhsulu həm kosmetikada, həm də sağlamlıq sahəsində cazibədar edir.
Tərkibi vitamin və minerallarla zəngindir. Eşşək südündə A, B1, B2, C, D və E vitaminləri mövcuddur. Bundan başqa, dəmir, kalsium, maqnezium və fosfor kimi minerallar var. Bu, orqanizmin immun sistemini gücləndirmək və sağlam böyüməni dəstəkləmək üçün əhəmiyyətlidir.
Eşşək südü ana südünə ən yaxın tərkibə malikdir. Buna görə süd allergiyası olan körpələr üçün alternativ kimi istifadə edilir. Hipoallergen xüsusiyyəti ilə tanınır.
Bu məhsul kosmetika sahəsində də geniş istifadə olunur. Eşşək südü, dəriyə nəmləndirici təsir göstərir və qocalma əlamətlərini yavaşlatmağa kömək edir. Antibakterial xüsusiyyətləri dəridəki iltihabları azaltmağa da faydalıdır.
Eşşək südünün tərkibində prebiyotiklər və az yağ miqdarı mövcuddur ki, bu da həzm sistemini dəstəkləyir. Laktoz miqdarı yüksək olsa da, bəzi insanlar bu südü adi südlərə nisbətən daha asan həzm edə bilirlər.
