Gürcüstanda üsyan başladı, prezident inqilabın başına keçdi
Gürcüstan hökumətinin Avropa İttifaqına (Aİ) üzvlük danışıqlarını 2028-ci ilə qədər təxirə salmaq qərarı ölkədə genişmiqyaslı etirazlara səbəb olub.
Tacxeber.com xəbər verir ki, Prezident Salome Zurabişvili bu qərara qarşı çıxaraq, hazırda Tiflisdə və ölkənin bir çox yerlərində xaotik şəkildə küçələrə axışan etirazçılara qoşulub və yeni “qızılgül” inqilabının ön sıralarında yer alıb.
Prezident Zurabişvili xüsusi təyinatlı qüvvələrin Azadlıq meydanına gedən yolu bağladığı bir vaxtda onlara yaxınlaşaraq, “Kimə xidmət edirsiniz?” sualını verib və cavab almamağından narazılığını ifadə edib.
Gürcüstanın Aİ-yə üzvlük prosesi son aylarda ciddi kataklizmlərlə müşayiət olunur. Avropa Komissiyası Gürcüstanın siyasi kursunu dəyişdirməsini tələb edərək, rəsmi Tbilisə Aİ-yə qəbulla bağlı danışıqlara başlamaq üçün tövsiyə verməkdən imtina edib. Bu qərar Gürcüstanın Avropa inteqrasiyası yolunda əhəmiyyətli bir əngəl kimi qiymətləndirilir.
Müxalifət partiyaları və vətəndaş cəmiyyəti təşkilatları hökumətin qərarına qarşı kütləvi etiraz aksiyaları təşkil ediblər. Paytaxt Tbilisidə və digər böyük şəhərlərdə minlərlə insan küçələrə çıxaraq, hökumətin qərarını pisləyib və Avropa İttifaqına inteqrasiyanın davam etdirilməsini tələb ediblər.
Prezident Zurabişvilinin etirazçılara qoşulması və hökumətin qərarına qarşı çıxması ölkədə siyasi gərginliyi daha da artırıb. Bu vəziyyət Gürcüstanın daxili siyasətində ciddi dəyişikliklərə səbəb ola bilər və ölkənin Avropa ilə münasibətlərinə təsir göstərə bilər.
